ޗައިނާއަށް ކުރެއްވި ރަސްމީ ދަތުރުފުޅުގެ ތެރެއިން، 130 މިލިއަން ޑޮލަރުގެ ހިލޭ އެހީ ހަމަޖެހިގެންދިޔަ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައިވަނީ ޗައިނާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު އެނބުރި ރާއްޖެ ވަޑައިގެން، ވެލާނާ އިންޓަރނޭޝަނަލް އެއާޕޯޓްގައި ނޫސްވެރިންނަށް މައުލޫމާތު ދެއްވަމުންނެވެ.
ރައީސް ޑރ.މުއިއްޒު ވިދާޅުވީ ޗައިނާއަށް ކުރެއްވި ދަތުރުފުޅުގެ ތެރެއިން އެގައުމުގެ ސަރުކާރުން ރާއްޖޭގެ ތަރައްޤީގެ އެކި ކަންކަމަށް 130 މިލިއަން ޑޮލަރުގެ ހިލޭ އެހީ ދިނުމަށް ހަމަޖެހިފައިވާކަމަށެވެ. މީގެ ތެރެއިން އެންމެ ބޮޑު ހޭދައެއް ކުރުމަށް ހަމަޖެހިފައިވަނީ މާލޭގެ މަގުތައް ހެދުމަށެވެ. ރައީސް ވިދާޅުވީ މީގެ އިތުރުންވެސް އުމްރާނީ ތަރައްޤީގެ އެކި ކަންކަމަށް މި ފައިސާއިން ހޭދަ ކުރެވިގެންދާނޭ ކަމަށެވެ.
"މީގެ އިތުރުން މި ދަތުރުފުޅުގައި ރަސްމާލޭގައި 36،000 ސޯޝަލް ހައުސިން ޔުނިޓުގެ މަސައްކަތްކުރުމަށްޓަކައި އެކަމަށްޓަކައި ވާންޖެހޭ އެއްބަސްވުމާއި، ވެލާނާ އެއާޕޯޓް ސަރުކާރުން ޕްލޭންކޮށްފައިވާގޮތަށް ތަރައްޤީކުރުމަށްވެސް ވަނީ އެއްބަސްވުންތައް ހެދިފައި" ރައީސް ޑރ.މުއިއްޒު ވިދާޅުވިއެވެ.
H.E. President Dr @MMuizzu and H.E. First Lady Sajidha Mohamed return to Maldives after their state visit to the People’s Republic of China at the invitation of the President of China, H.E. Xi Jinping. pic.twitter.com/LDxNXyjeg1
— The President's Office (@presidencymv) January 13, 2024
ރައީސް ވިދާޅުވީ ޗައިނާއަށް ކުރެއްވި މި ދަތުރުފުޅުގައި އެގައުމަށް ރާއްޖެއިން ދައްކަން ޖެހޭ ދަރަނި ދެއްކުމުގައި ލުއި ފަސޭހަ އިންތިޒާމުތަކެއްވެސް ހަމަޖެއްސުމަށް ޗައިނާގެ ރައީސް ޝީ ޖިންޕިން އާއެކު މަޝްވަރާ ކޮށްފައިވާކަމަށެވެ.
ރައީސް ޑރ.މުއިއްޒު ޗައިނާއަށް ކުރެއްވި މި ދަތުރުފުޅަކީ، ބޭރުގައުމެއްގެ ރައީސަކު މިއަހަރުގެ ތެރޭގައި އެގައުމުގެ ރައީސްގެ ދައުވަތަކަށް ކުރެއްވި ފުރަތަމަ ދަތުރުފުޅެވެ.