ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންނަށް ރަށްރަށުގައި ހިންގާ ބޯހިޔާވަހިކަމުގެ ސްކީމުތަކުގެ ދަށުން ސޯޝަލް ހައުސިން ޔުނިޓްތައް ލިބޭނެ ގޮތަށް ހާއްސަ ކެޓަގަރީއެއް ހިމަނާފައިވާނެ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ސަރުކާރުގެ ފުރަތަމަ 14 ހަފްތާތެރޭގައި ކުރެވުނު ކަންތައްތައް ހާމަކުރައްވަމުން ހައިދަރު ވިދާޅުވީ، ގާނޫނުއަސާސީން ކޮންމެ ރައްޔިތަކަށް ލިބިގެންވާ ބޯހިޔާވަހިކަމުގެ ހައްގު އެހެން ވަޒީފާތައް އަދާކުރާ ފަރާތްތަކާއި އެއް ހަމައެއްގައި ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ވެސް ހޯދައިދިނުމަށް ހާއްސަ ސޯޝަލް ހައުސިން ކެޓަގަރީއެއް ވަޒީރުންގެ މަޖިލީހުގެ މަޝްވަރާއެކު ރައީސް ކަނޑައަޅުއްވާފައިވާ ކަމަށެވެ.
އެގޮތުން، ބޯހިޔާވަހިކަން ފޯރުކޮށްދިނުމަށް ރާއްޖޭގެ އެކި ސަރަހައްދުތަކުގައި ކުރިއަށް ގެންދާ ސޯޝަލް ހައުސިންގެ މަޝްރޫތަކުގެ ވަކި އިންސައްތައެއް އެ ކެޓަގަރީގެ ދަށުން ފަތުރުވެރިކަމުގެ ސިނާއަތުގައި ވަޒީފާއަދާކުރާ ދިވެހީންނަށް ހާއްސަކޮށްގެން އެ ސަރަހައްދެއްގައި ފަތުރުވެރިކަމުގެ ސިނާއަތުގައި ވަޒީފާއަދާކުރާ މުވައްޒަފުންނަށް ހަމަޖެހިގެންދާނެ ކަމަށް އޭނާ ވިދާޅުވިއެވެ. އަދި އެއީ އެމީހުންނަށް މިލްކުވާ ގޮތަށް ދޭ ތަންތަން ކަމަށް ވެސް ހައިދަރު ފާހަގަކުރެއްވިއެވެ.
ހައިދަރު ވިދާޅުވި ގޮތުގައި ބޯހިޔާވަހިކަމަށް "ހިޔާވަހި ޕޯޓަލް" ގެ ނަމުގައި ޕޯޓަލްއެއް ހަދައި ރައްޔިތުންނަށް ލުއި ފަސޭހަކޮށް މިކަން ކުރެވޭނެ ގޮތް ރައީސް ހަމަޖައްސަވާފައިވެއެވެ.
ހަފްތާ 14 ގައި މިނިސްޓްރީން ކުރި ބައެއް ކަންކަން:
- ސިނަމާލެ އާއި މާލެ ހިޔާ ފްލެޓްތަކުގެ ވެރިފަރާތްތައް ކޮންޑަމީނިއަމް ރަޖިސްޓްރީއެއްގައި ހިމެނުމަށް އެއްމެދު އިމާރާތެއްގެ ޤާނޫނީ އިޖުރާއަތްތަކާއި އެއްގޮތްވާ ގޮތުގެ މަތިން އެ ފްލެޓް ނުވަތަ ހައުސިންގ ޔުނިޓްތައް ސަރުކާރުން ޤާއިމުކޮށްފައިވާ ސްޓާޓާ ޕޯޓަލް މެދުވެރިކޮށް އެގްރީމެންޓްކުރުން
- ކޮންމެ ހިޔާ ޓަވަރެއްގައި އިތުރު ދެ ލިފްޓް ހަރުކުރުމަށް އެޗްޑީސީން ވަނީ ޗައިނާ ކުންފުންޏަކަށް ހަވާލުކުރުން
- ބޯހިޔާވަހިކަމުގެ މަޝްރޫއުތައް ރެގިއުލޭޓް ކުރުމަށް ގެދޮރުވެރިކަމުގެ މިންގަނޑުތައް އެކުލެވޭ ބިލެއް ޑްރާފްޓްކޮށް ރައްޔިތުންގެ މަޖިލީހަށް ފޮނުވުން
- ބޯހިޔާވަހިކަމާއި އުމްރާނީ ތަރައްގީއާ ބެހޭ ޓްރަސްޓު ފަންޑެއް ގާއިމުކުރުމާއި ބެހޭ ކަރުދާސް 14 ހަފްތާވުމުގެ ކުރިން ކެބިނެޓަށް ހުށަހަޅާ އަދި އިކޮނޮމިކް ކައުންސިލުގައި މަޝްވަރާކޮށް ތަފްސީލުތަކާ ހިސާބަށް އެދުން
- ބޯހިޔާވަހިކަން ފޯރުކޮށްދިނުމަށް 5 ޕަސެންޓް އިންޓްރެސްޓްގައި ތައާރަފްކުރާ ލުއިލޯނާއިބެހޭ ސިޔާސަތު އެކުލަވާލާ އަމަލުކުރުމާއި ގުޅޭގޮތުން 22 ފެބްރުއަރީ 2024 ވަނަ ދުވަހު އިކޮނޮމިކް ކައުންސިލާއި މަޝްވަރާކޮށް ނިންމުން
- މާލޭގައި ކުރިން ހިންގި ނީލަން ވިޔަފާރިތައް އަލުން ފެށުމަށް ހުޅުމާލެއިން ބިމެއް ހޯދުން
- ވިލިމާލޭގައި ފައިބަރު ދޯނިތަކުގެ މަސައްކަތް ކުރާ މީހުންނަށް ދިމާވެފައިވާ ދަތިތަކަށް ހައްލެއް ހޯދުމަށް މާލޭ އޭރިއާ އިން ތިލަފުށީގެ އެތެރެ ފަޅުން ހިއްކާފައިވާ ސަރަހައްދުން 30،000 އަކަފޫޓުގެ ބިން ކެނޑުން
ހަފްތާ 14 ގައި މިނިސްޓްރީން ކުރަން ހުރި ބައެއް ކަންކަން:
- ރަށްރަށުގެ ފްލެޓާއި ރޯހައުސްތަކަށް މަހުން މަހަށް ދައްކަންޖެހޭ ކުލި 3،333ރ. އަށް ކުޑަކޮށް، 20 އަހަރުން ދައްކަން ޖެހޭ ގޮތަށް ބަދަލުކުރުން. މިއީ 5،000ރ. ކުލީގެ ގޮތުގައި ނަގަމުން އައި ތަންތަން
- ބޯހިޔާވަހިކަމާ ގުޅޭ ޓްރަސްޓް ފަންޑުގެ އޮނިގަނޑު އެކުލަވާލުން
- މާލޭގައި ހުރި ވޯކްޝޮޕްތަކާއި ގުދަންތައް ސިނާއީ ސަރަހައްދަށް ބަދަލުކުރުމަަށް ސާވޭއެއް ކުރުމާއި ސިނާއީ ސަރަހައްދު ތަރައްގީކުރުމަށް ޕްލޭން އެކުލަވާލުން
- ލޭންޑް ޔޫސް ޕްލޭންތައް އެކުލަވާލުމަށް ހާއްސަ ޕޯޓަލެއް ގާއިމުކުރުން
- ކުރިއަށް އޮތް 20 އަހަރުގެ ތަރައްގީގެ މާސްޓާ ޕްލޭން އެކުލަވާލުން. އޭގެ ފްރޭމްވޯކް ނިންމައި އެކުލަވާލުމުގެ މަސައްކަތް ކުރުމަށް ފަންނީ އަދި ބައިނަލްއަގްވާމީ ފަރާތްތަކުގެ އެހީ ހޯދުމުގެ މަސައްކަތް ދަނީ ކުރަމުން
- ބާޖަމާލުއްދީންގައި ބިމުން ބައެއްގައި އަންޑަގްރައުންޑް ޕާކިން ޒޯނަކާއި މައިޒާނެއް ހެދުމުގެ މަސައްކަތް ކުރުން
- ރިއަލް އެސްޓޭޓް ވިޔަފާރި ފުޅާކުރުމަށް އެކަމާ ގުޅޭ ބިލެއް މަޖިލީހަށް ފޮނުވުން
