އިމާމުވެ ހުކުރު ކުރާނެ ޒުވާން ހަތީބުން ތަމްރީނު ކުރުމުގެ ގޮތުން އިސްލާމިކް މިނިސްޓްރީން ފެށި ޕްރޮގްރާމްގެ ފުރަތަމަ ބެޗްގައި 57 ޒުވާނަކަށް ހުއްދަ ދީފިއެވެ.
މި ތަމްރީނު ޕްރޮގްރާމް ނިންމާލައި ހުއްދަ ދިނުމުގެ ރަސްމިއްޔާތު ބޭއްވީ އިއްޔެއެވެ. ހުއްދަ ހޯދި 57 ހަތީބުން މި ރޯދަ މަހުގެ ތެރޭގައި އިމާމުވެ ހުކުރު ކުރަން ފަށާނެއެވެ.
އެގޮތުން، ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހާއްސަކޮށްގެން ފެށި ޕްރޮގްރާމްގެ ފުރަތަމަ ބެޗަށް ހުޅުވައިލުމުން 160 ޒުވާނަކާ އިންޓަވިއުކޮށްފައިވެއެވެ. އަދި އިންޓަވިއުއަށްފަހު 77 ޒުވާނަކާއެކު ތަމްރީނު ޕްރޮގްރާމް ފެށާފައިވަނީ މިދިޔަ މަހުގެ 12 ވަނަ ދުވަހުއެވެ.
ނަމަވެސް ފުރަތަމަ ބެޗް ނިންމައި ހުއްދަ ހާސިލުކުރީ އޭގެ ތެރެއިން 57 ޒުވާނެކެވެ.
އިސްލާމިކް މިނިސްޓްރީން ބުނި ގޮތުގައި ހަތީބުން ތަމްރީނު ކުރުމުގެ އިތުރު ބުރެއް ވަރަށް އަވަހަށް އަދި ފަށާނެއެވެ.
