މެޝިނުތަކުން އިވެމުން ދިޔަ އަޑު ތަކާއި ދޭތެރެއަކުން އިވިގެންދާ ކޮންމެވެސް ބަލިމީހެއްގެ ވޭނީ އާހެއް ފިޔަވައި އިތުރުއަޑެއް ނީވޭ އައިސީޔޫ ތެރެއިން ފެންނަނީ ހަމަހިމޭންކަމެވެ. މުސްކާން އޮތް އެނދުގެ ކައިރީގައި ހުއްޓިލައިގެން ސާރާ އޭނާގެ ލޯބިވާ ދަރިފުޅުގެ އެއްވެސް ހަރަކާތެއް ނެތް އަތުގައި ހިފާލައިގެން ހުރި އިރު އޭނާގެ ދެލޯ ވަނީ ފެންކަޅިވެފައެވެ. އެދަރިފުޅުގެ ހަޔާތުގެ އެންމެ ފަހުވަގުތުތައް ގުނަމުންދާހެން އޭނާއަށް ހީވާކަހަލައެވެ. އެކުއްޖާފުޅު މިދުނިޔެމަތީގައި ހޭދަކުރި 21 އަހަރުގައި ހާދަ ވޭނެއް ތަހައްމަލް ކޮއްފިއޭ ސާރާގެ ހިތައްއެރިއެވެ. އިތުރަށް ދުނިޔޭގައި ހުރުމަށް ވުރެ މިދުނިޔެއާއި ވަކިވުންވެސް އެކުއްޖާއަށް މާ ރަނގަޅުވާނެއޭ ބައެއްފަހަރު އޭނާގެ ހިތައް އަރައެވެ. އެހާވެސް ހިތަށް އުނދަގޫވެއެވެ.
މުސްކާންގެ މައުސޫމު ދެލޯ މަޑުމަޑުން ހުޅުވާލިއެވެ. މަންމަގެ މޫނުފެނުމުން އެދެލޮލުން ދިރުމެއް ވިދާލިކަހަލައެވެ. މަންމަގެ އަތުތެރޭގައިވާ އޭނަގެ އަތުން އެދެއަތުގައި ހިފާ ފިތާލަން ބޭނުންވިއެވެ. މަންމައަށް ގޮވާލަން ބޭނުންވިއެވެ. މަންމަގައިގައި ބައްދާލާފައި އޭނާގެ ހިތުގެ ހުރިހާ ޝުއޫރުތައް ފާޅުކޮއްލަން ބޭނުންވިއެވެ. އޭނާގެ ހާލަތު ބަޔާންކޮށްދޭން ބޭނުންވިއެވެ. ނަމަވެސް އެއިން އެއްވެސް ކަމެއް އޭނާއަކަށް ނުކުރެވޭނެއެވެ. ކުޑަމިނުން އެހެންޏާ މަންމައަށް ގޮވާލަން ހަދާހެން 'މާ.." އޭކިޔާފައި އަޑެއް ވެސް ލައްވައެއްނުލެވެއެވެ. ދަރިފުޅު ލޯހުޅުވާލައިގެން އޮތުމުން ސާރާ މަޑުމަޑުން އެދަރިފުޅުގައިގައި ފިރުމާލިއެވެ. އެވަގުތު މުސްކާންގެ ހިތައް އެތައްއެއްޗެއް އަރާފައިބަމުން ދިޔައެވެ. މަންމަ އަށް ކިޔައިދޭން ބޭނުންވި ހުރިހާ ވާހަކައެއް އޭނާގެ ނާޒުކް ސިކުނޑީގައި އެނބުރެންފެށިއެވެ.
" މަންމާއެވެ. ލޯބިވާމަންމާއެވެ. މަންމައާއި މެދު އަހަރެންގެ އެއްވެސް ޝަކުވާއެއްނެތެވެ. މައެއްގެ ވާޖިބު މަންމަ ވަރަށް ފުރިހަމައަށް އަދާކުރިއެވެ. ބޭކާރު މަސްގަޑަކަށް ވިޔަސް އަހަރެން ބޭކާރު ކޮށްނުލާ އެންމެ ލޯބިން ގެންގުޅެ ބޮޑުކުރީމުއެވެ. އެހެން ދަރިންނާއި ތަފާތެއް ނުކުރަމުއެވެ. އަހަންނާއި އެކަށީގެން ވާ ފެންވަރަަށް ކިޔަވައިދެވޭތޯ މަސައްކަތް ކުރީމުއެވެ. ފުރޮޅުލީ ގޮނޑި ދަމާފައި މަދަރުސާއަށް ގެންގޮސް ގެނެސް ކިޔަވައިދީ ހެދިއެވެ. އަމިއްލަ އަތުން ބަތްސުވާއެއް ވެސް އަނގައަށް ނުލެވޭ އިރު އެންމެ ވަގުތަކު ވެސް އަހަރެން ބަނޑުހައިވިޔަ ނުދެއެވެ. ފެންވަރުވާ ރީތިކޮށް އެހެންކުދިން ވެސް ލާކަހަލަ ރީތި ހެދުން ލައްވައިދެއެވެ. އަހަރެން އުފަންވީ ނުކުޅެދޭ ކުއްޖެއްގެ ގޮތުގައިކަން އިހުސާސް ވިޔަނުދީ ގެންގުޅެވޭތޯ ވަރަށް މަސައްކަތް ކުރިކަން އަހަންނަށް އެނގެއެވެ. މަންމަ އަހަރެން ބޮޑުކުރީ އަބަދުވެސް ހެވިފައި ހުންނަކުއްޖެއްގެ ގޮތުގައެވެ. ނަމަވެސް ހަގީގަތަކީ ބަދަލު ކުރެވޭނެ އެއްޗެއްނޫނެވެ. މަންމައަށް ވެސް ކެތްކުރެވޭނީ ވަކިވަރަކަށެވެ. ބޮޑެތިވެ ޒުވާން ވުމުން އެހެންއަންހެން ކުދިން އަމިއްލަ ދިރިއުޅުން ފަށައެވެ. އަހަރެން އަދިވެސް ، އަދި ދުނިޔޭގައި އުޅުނިއްޔާ އުޅޭހާ ދުވަހަކު ޖެހޭނީ އެހެންމީހެއްގެ އެހީގައި އުޅޭށެވެ. ހާއްސަ އެހީއަށް ބޭނުންވާ ކުދިންނޭ އަހަރެމެންނަށް ކިޔަނީ އެހެންވެގެންނެވެ. މަންމާއެވެ. މަންމަ އަހަންނަަށް ޓަކައި ވީ ގުރުބާނީތައް ބޮޑެތި ވެފައި ގިނައެވެ. މަންމަގެ ހުރިހާ ވަގުތެއް އަހަންނަށްޓަކައި ހުސްކުރީމުއެވެ. ވަޒީފާއިން ކެނޑުނީ އަހަރެން ބަލަންވެގެންނެވެ. ހުރިހާ ސަމާލުކަމެއް އަހަންނަށް ދިނީމުއެވެ. އަހަރެންގެ އުމުރުން ވިހިއަހަރު ވަންދެން ވެސް ކުޑަކުއްޖަކު ފަދައިން ގެންގުޅުނީމުއެވެ. ބައްޕަ އަހަންނަކީ ބުރައަކަށްވެ ކެތްނުވެގެން މަންމަ ދޫކޮށްލާފައި ދިއުމުން ދެންވެސް މަންމަ ކެތްކުރިއެވެ.
މަންމަ އަލުން ވަޒީފާއަށް ވަނީ ތިންކުދިންގެ ޚަރަދުތަށް ކުރާނެގޮތެއް ހޯދުމަށެވެ. އެކަމަށް މަޖުބޫރުވުމުންނެވެ. އަހަރެން އެކަނިކޮށް އެއްލާލާފައި ދިޔައީ އެއްނޫނެވެ. މަންމައަށް ވީ އެންމެ ރަނގަޅު އިންތިޒާމެއްގެ މަތިން އަހަރެން ބެލުމުގެ ކަންތައް ހަމަޖެއްސިއެވެ. އަހަރެން ބަލަން ގެއަށް މީހަކު ގެނައެވެ. އެތަށް ބަޔަކާއި އިންޓަވިއުކޮށް ވަނަވަރުބަލާ ހަދާފައި އެންމެންގެ ތެރެއިން ކަމާލާ ހޮވީ އޭނާ އަކީ އެންމެއެކަށީގެންވާ މީހާ ކަމުގައި މަންމައަށް ފެނުމުންނެވެ. އޭނާ އަކީ ނަރުސްކަން ކޮށް ބަލިމީހުން ބެލުމުގެ ތަޖުރިބާ ލިބިފައިވާ މީހެކެވެ.
ކަމާލާ އަހަންނަށް ވަރަށް ރަނގަޅެވެ. އަހަރެންގެ ހުރިހާކަމެއްވެސް ކޮށްދެނީ ލޯބިންނެވެ. އޭގެ އިތުރުރުން އަހަރެން އެންމެ ގަޔާވީ އޭނާގެ ސަކަމިޒާޖެވެ. އަހަންނާއި އެކު ސަކަރާތްޖަހާ އަހަރެން އުފާކޮށްދޭން މަސައްކަތްކުރެއެވެ. އެއްދުވަހު އަހަރެން ފެންވަރުވާ ރީތިކޮށްފައި ގެނެސް މޭކަޕް ކޮށްދިނެވެ. އަހަރެން ވެސް އެހެން އަންހެން ކުދިން ފަދައިން އަނދުންއަޅާލާ ލިޕްސިޓް ޖައްސާލާ ހިތްވެއެވެ. އެދުވަހު ކަމާލާ އަހަރެން ރީތިކޮށްފައި ލޯގަނޑުން ދައްކާލުމުން އަހަރެންގެ ހިތައްއެރިއެވެ. އަހަރެންވެސް ހުތުރެއްނޫނެވެ. އިސްތަށިގަނޑު ފަންވެފައި ކަޅެވެ. ހަންގަޑު އޮމާންވެފައި ދޮނެވެ. ގައިމު ކޮންމެވެސް މީހަކަށް އަހަރެން ރީތިވެދާނެއެވެ. އަހަންނާ އިންނާނެ މީހަކު ވެސް އުޅެފާނެއެވެ. އެހެން ހިތައްއެރުމުން އަހަރެން ލަދުން ގޮސް ރަކިވިއެވެ. މީހުން އަހަންނަކީ ކުޑަކުއްޖެއްކަމުގައި ދެކުނަސް ޒުވާންކަމުގެ އިހްސާސް އަހަރެންގެ ހިތުގައިވެސް ވިންދުޖަހައެވެ. ދިރިއުޅުމާއި މެދު އުންމީދުތަކަކާއި ހުވަފެންތަކެއް ވެސް ދެކެވެން ފެށިއެވެ. ޑޮކްޓަރުން ބުނާގޮތުގައި އަހަރެންގެ ސިކުނޑިއަކީ އުމުރަށް ވުރެ ދިހަ އަހަރު ޅަ ސިކުނޑިއެކެވެ. ނަމަވެސް އަހަރެންގެ ވިސްނުން ހުންނަގޮތް އެނގޭނީ އަހަންނަށް އެކަންޏެވެ. އަހަރެން ވެސް ދުނިޔެވީ ކަންކަމާއި މެދު ވިސްނާ ފިކުރުކުރަމެވެ. އަހަންނަށް ހުރިހާ ކަމެއް ވެސް އެނގެއެވެ. ކުރަން ބޭނުންވާ ކިތައްމެ ކަމެއްވެސް ހުރެއެވެ. ޖިސްމާނީ ގޮތުން ބަލިކަށިވުމުން އެހެންމީހުން ފަދައިން ނޫޅެވެނީއެވެ. ކޮންމެވެސް ދުވަހަކުން، ޒަމާނީ ޓެކްނޮލޮޖީ އެހީގައި ނަމަވެސް އަހަންނަށް އަމިއްލަ ހާލާއިގެން އުޅެވެން ފެށުމަކީ އަހަރެންގެ އެންމެ ބޮޑު އުންމީދެވެ.
މަންމާއެވެ. އަހަރެންގެ އުންމީދުތަކާއި ހުވަފެންތަށް މަންމައަށް ކިޔާދެވޭނެމައެވެ. އެއަށްވުރެ ބޮޑަށް އަހަރެންގެ ހާލު ކިޔައިދެވޭނެނަމައޭ ހިތައްއަރައެވެ. އަހަންނަށް ކުރިމަތިވާ އެއްވެސް ކަމެއް މަންމައަކަށް ނެނގޭނެއެވެ. ކަމާލާއާއި އަހަރެން ހަވާލުކުރިފަހުން މަންމައަށް އަހަންނާއި އެކު ހޭދަކުރެވޭ ވަގުތު މަދެވެ. ވަޒިފާގައި އުޅެންޖެހޭލެއް ބުރަކަމުންކަން އަހަރެން ގަބޫލުކުރަމެވެ. ކަމާލާ އައިފަހުން ހޭދަވި ފުރަތަމަ ހަމަސްދުވަހަކީ މަންމައާއި ތަންކޮޅެއް ދުރުގައި އުޅުނަސް އަހަރެން ހަޔާތުގެ އެންމެ އުފާވެރި ދުވަސްކޮޅެވެ. ކަމާލާގެ ރަނގަޅު ކަމުންނާއި މަޖާކަމުންނެވެ. ކަންތައްތައް ބަދަލުވީ މަންމަގެ ވެސް ކޮންމެވެސް ވަރެއްގެ އިހުމާލެއް އޮވެގެންނެވެ.
ކިތަންމެ ރަނގަޅުހެން ހީވިއަސް މީހުންނަށް މާބޮޑަށް އިތުބާރުކުރާކަށް ނުވާނެއެވެ. ކަމާލާގެ ރަނގަޅުކަމުން ކުރި އިތުބާރެއްގެ ބޮޑުކަމުން އޭނާގެ ފިރިމީހާ އަޚްތަރުމިއާ އަށް ވެސް މަންމައަށް މާ ބޮޑަށް މަރުހަބާ ކިޔުނީއެވެ. އަޚްތަރުމިއާ ވެސް ގެއަށް އައިސް ވަރަށް ހެޔޮކޮށް އުޅުނުދޯއެވެ. ގެއަށް ބާޒާރުކޮށްދީ ހިލޭ ކުނިއުކާދީ ހަދާތީ މަންމަ ހީކުރީ ވަރަށް ރަނގަޅު މީހެއްކަމުގައެވެ. އަގަކާއި ނުލާ މީހަކު ކަމެއްކޮއްދޭނެހެއްޔެވެ. އަހަންނަކީ ހާއްސައެހީއަށް ބޭނުންވާ ކުދިންނަށް ލިބޭ އިނާޔަތް ލިބޭ ކުއްޖެއްކަމާއި މަންމައަކީ ވަޒީފާއަދާކޮށްގެން ލާރިލިބޭ މީހެއްކަން އެމީހުންނަށް އެނގެއެވެ. އަޚްތަރުމިއާ ކަމާލާ އަތުން ލާރިހޯދައެވެ. ކަމާލާގެ މުސާރަ ހުސްވުމުންވެސް ލާރިއަށް ކިޔައެވެ. ގޭގެ ޚަރަދުތަކަށް ކަމާލާ އަތަށް ދީފައިހުންނަ ލާރިވެސް އަތުލައެވެ. އެއްޗެއްނެތިއްޔާ އޭނާ ކަމާލާއަށް އަނިޔާކުރެއެވެ. އަހަރެން ކުރިމަތީގައެވެ. ކަމާލާ އިތުރުވަޒީފާއަކަށް ދާން ބުނީ އެހެންވެގެންނެވެ. ދެގަޑިއިރަށް މެންދުރު ކައްކައިދިނުމަށް ގެއަކަށް ދާންފެށީ މަންމަ ހުއްދަދިނުމުންނެވެ. އެވަގުތު ކޮޅު އޭނާގެ ފިރިމީހާ އަހަރެން ކައިރީގައި މަޑުކޮށްދޭނެ ކަމުގައި ބުނުމުން އެކަމާވެސް މަންމަ އެއްބަސްވީއެވެ. ހުދު ތާކިހާ އަޅާ ތުނބުޅި ދިގުކޮށްފައި ހުންނަ ފަސްނަމާދަށް މިސްކިތަށްދާ ދީންވެރި މީހެއްހެން ހީވާތީ މަންމަ އިތުބާރުކުރީކަން އަހަންނަށް އެނގެއެވެ. ކަމާލާ ދަނީ ހެނދުނު ދިހައަކުން ބާރައަށެވެ. އެގަޑީގައި ގޭގައި އަހަރެން ފިޔަވާ އިތުރުމީހަކު ނޫޅެއެވެ.
ފުރަތަމަ ދެތިން ދުވަހު ދިޔައީ ވަރަށް އޮމާންކޮށެވެ. އަހަރެންގެ ހުރިހާކަމެއް ހަމަޖައްސާފައި ކަމާލާ ދަމުން ދަނީ ފިލްމެއް އަޅުވައި ދީފައެވެ. ދެގަޑިއިރު ތެރޭގައި އަހަރެން ފޫހިވިޔަނުދިނުމަށެވެ. ނުވަތަ އަހަރެންގެ ވަގުތު ހޭދަކުރާނެ ގޮތެއް ކަމުގައި ހީކޮށެވެ. އެންމެ ދެގަޑި އިރުތެރޭގައި ވެސް ކިތަންމެ ކަމެއް ބަދަލުވެދާނެ އެެވެ. ހަތަރުވަނައަށް ވީ ދުވަހުގެ އެ ވަގުތުކޮޅަކީ އަހަރެންގެ ހަޔާތަށް އައި އެންމެ ބިރުވެރި ވަގުތެވެ. ދުވަހަކު ވެސް ނުދެކޭ ފަދަ ބިރުވެރި ހުވަފެނެއްކަހަލައެވެ. ދުވަހަކު ތަހައްމަލު ނުކުރާ ތަދަކާއި ވޭނެކެވެ. ދުވަހަކު ކުރިމަތިލާން ޖެހިދާނެކަމަށް ހީވެސް ނުކުރާ ނާމާން ކަމެކެވެ. ކަމާލާގެ ފިރިމީހާ އަހަރެންގެ އިއްފަތްތެރިކަން ފޭރިގަތީ އެއްވެސް ރަހުމެއް ހަމްދަރުދީއެއްނެތިއެވެ. ނިކަމެތި ޟައީފް އިންސާނެއްގެ މަޖުބޫރުކަމުގެ ފައިދާ އެނުލަފާ މީހާ ނެގީ އިންސާނިއްޔަތުކަމުގެ ކުޑަވެސް މިންވަރެއްނެތިއެވެ. އަހަރެން ރުއީމެވެ. ހަޅޭލެވީމެވެ. ނަމަވެސް އެއަޑު އަހާނެ އެއްވެސް މީހަކުނެތެވެ. ކަމާލާ ގެއަށް އައި އިރު ވާނެއެއްޗެއްވެ ނިމިއްޖެއެވެ. އަހަރެންގެ ފަނޑު ފަނޑު ދުނިޔެ އަބަދައްޓަކައި އަނދިރިވެއްޖެއެވެ.
އޭގެ ފަހުން އެއީ އެނުބައި މީހާގެ އާދައެކެެވެ. ކޮންމެ ދުވަހަކު އެގަޑީގައި އަހަންނަށް އެބިރުވެރިކަމާއި ކުރިމަތިލާން ޖެހެއެވެ. ކަމާލާ ދެކެވެސް އަހަރެން ރުޅިއައެވެ. މަންމަދެކެވެސް ރުޅިއާދެވުނެވެ. އަހަންނަށް ބުނަންބޭނުން އެއްޗެއް ނުބުނެވެއެވެ. އެންމެ ރުޅިއާދެވެނީ އަހަރެންގެ މަޖުބޫރީ ހާލަތާއި މެދުގައެވެ. މަންމަމެން ގެއަށް އައުމުން އަހަރެން އުޅޭ ގޮތުން މަންމަ ހީކުރީ އަހަރެން ފޫހިވެގެން އުޅޭގޮތެއްކަމުގައެވެ. އަހަރެންގެ އިހްސާސްތައް ހާމަކުރަން ކުރެވުނު ކަމެއް އަހަރެން ކުރީމެވެ. މަންމަމެން ހީކުރީ އަހަރެން ބަސްނާހަނީ ކަމުގައެވެ. ބޮޑާހާކަނީ ކަމުގައެވެ. އަހަރެންގެ ކަންތައް މާމައްޗައްދަނީކަމުގައެވެ. ޑޮކްޓަރަށް ގެންގޮސް އިންޖެކްޝަން ޖަހައިގެން އަހަރެން މައިތިރިކުރުވި އިރު އެއްފަހަރު ވެސް އަހަންނަށް ވަމުންދިޔަ ގޮތާމެދު ކުޑަކޮށްވެސް ވިސްނާލާކަށް މަންމައަށް ވެސް ނޭނގުނެވެ. އަހަރެންގެ ހަށިގަނޑަށް އައިސްފައިވާ ބަދަލުތައް ޑޮކްޓަރުންނަކަށް ނޭގުނެވެ. ނުވަތަ ނުބަލައެވެ. މަންމާއެވެ. އެމީހާ އަހަންނަށް ހާދަ އަނިޔާއެއްކުރިއެވެ. މަންމައަށް އެނގުނުނަމަ ހިތްވެސް ހުއްޓުނީހެވެ. ދުވަސްވީވަރަކަށް އެއަޚްތަރުމިއާގެ އުނދަގޫ ދިޔައީ ބޮޑުވަމުންނެވެ.
މަންމާއެވެ. ދެލޮލުގެ ކޮއިހެން ގެންގުޅުނު ދަރިއަކަށް އެފަދަ ބޮޑު ކަމެއް ކުރިމަތިވިއިރު މަންމައަށް ކުޑަކޮށް ވެސް ޝައްކުވެސް ނުވީކީއްވެ ހެއްޔެވެ. އަހަރެން އެހާލުގައި އުޅޭތާ ކިހާދުވަހެއްވެއްޖެހެއްޔެވެ. އެ ނުބައި ނުލަފާމީހުންގެ ނުބައި އަމަލުތައް ފަޅައެއްނާރައެވެ. އެކަކަށްވެސް ނޭނގެއެވެ. އެގޮތުގައި އެކަން އޮތްހާދުވަހަކު އެކަންދެމިގެން ދާނެނޫންހެއްޔެވެ. ނަމަވެސް މިހާރު އަހަރެން ވަރުބަލިވެއްޖެއެވެ. ދެން އަހަރެންގެ ނިކަމެތި ޖިސްމަކަށް ކުޅަދާނައެއްނޫނެވެ. މިހިތަކަށް ކެތެއްނުވާނެއެވެ. މިއަދު އަހަރެން ވަނީ ނުބައި ބައްޔެއްގެ ޝިކާރައަކަށްވެފައެވެ. އަހަރެންގެ ހަށިގަނޑުގައި އަޅަމުންދާ ވޭން އެނެގޭނީ އަހަންނަށެވެ. ޑޮކްޓަރުން ބުނަނީ އަހަރެންގެ ދިފާއީ ނިޒާމް ހަލާކުވެފައިވާކަމުގައެވެ. މަންމަ ހީކުރަނީ އަހަރެންގެ އުފެދުމުގައިވެސް ހުރި ނުކުޅެދުންތެރިކަމުގެ ސަބަބުން، އުމުރުން ދުވަސްވުމުން އަހަރެންގެ ދިފާއީ ނިޒާމް ބަލިކަށިވީކަމުގައެވެ. އަހަރެން ދުނިޔޭގައި ހުންނާނީ މަދުއަހަރުތަކެއްވަންދެން ކަމުގައި ކުރިންވެސް މީހުން ބުނިދޯއެވެ. މަންމަ ތިހުންނަނީ އަހަރެންގެ ފަހުވަގުތު ގުނާލަގުނާލައެވެ. މިއަދު މިއެނދުގައި އޮންނަން ޖެހުނު ހަގީގީ ސަބަބު ކުޑަކޮންވެސް ނޭގިއެވެ. މަންމާއެވެ. މިހުރިހާ ވާހަކަތަކެއް އަހަންނަށް ބުނދެވޭނެނަމައެވެ. ފަހަރެއްގައި އަހަންނަށް ފަރުވާވެސް ކުރެވުނީހެވެ. މިތަނުން ނުކުމެގެން އެނބުރި ގެއަށް ދެވޭނެކަމުގެ އުންމީދެއްނުކުރަމެވެ. ނަމަވެސް ދެވުނަސް އަދިވެސް ކުރިމަތިލާންޖެހޭނެ ހާލަތު އަހަންނަށް އެނގެއެވެ. އަޅެ އަހަންނަށް ބުނެދެވޭނެ ނަމައެވެ. ހާލަތު ބަދަލުވީސް ނުންހެއްޔެވެ."
މުސްކާންގެ ނިތްކުރީގައި ބޮސްދީފައި ސާރާ އައިސީޔޫ އިން ނުކުންނަށް ހިނގައިގަތީ އެތަނުގައި ހުރެވޭ ގަޑިހަމަވުމުންނެވެ. މުސްކާން އޭނާގެ ދެލޯ މަރާލިއެވެ. އެމަޖުބޫރު ނިކަމެތި ކުއްޖާގެ ހާލަތު އޭނާއަކަށް ބަޔާނެއް ނުކުރެވޭނެއެވެ. އެފަދަ ކިތައްކުދިން މިދުނިޔޭގައި އުޅޭނެހެއްޔެވެ. ނިކަމެތި މަޖުބޫރު އިންސާނުންގެ ނާޖާއިޒް ފައިދާ އެކިގޮތްގޮތުން އެކިމީހުން ނަގައެވެ. ދުނިޔޭގައި ނުބައި ނުލަފާ އިންސާނުން ގިނައެވެ. ވާހަކަ ނުދެއްކޭ ކުދިންނާއި، ސިކުނޑީގެ އުނިކަން ހުންނަކުދިންނާއި ޖިސްމާނީގޮތުން ބަލި ކުދިންނާއި ބުނެނުދެވޭ ވަރުގެ ތުއްތުކުދިން ވެސް އެފަދަ މީހުންގެ ޝިކާރަތަކަށްވެއެވެ. މިދުނިޔެއަކީ ވަރަށް ކެހިވެރިން ގިނަތަނެކެވެ. އެއްވެސް މީހަކަށް އިތުބާރުކުރާކަށްނުވާނެއެވެ. ކޮންމެ ކުއްޖަކީ އެކުއްޖެއްގެ ހާލަތު ބުނެދެވޭނެކުއްޖެއްނޫނެވެ.-ނިމުނީ –
