ގުޅީފަޅުން ދޫކުރުމަށް ހަމަޖެހިފައިވާ ގޯތިތައް ދޫކުރަން ފެށޭނެކަމަށް ލަފާކުރެވެނީ އަންނަ އަހަރުގެ ސެޕްޓެމްބަރ މަހު ހިސާބުގައިކަމަށް ހައުސިން މިނިސްޓަރު ޑރ.އަލީ ހައިދަރު ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ރައްޔިތުންގެ މަޖިލީހުގެ ގަޅޮޅު އުތުރު ދާރިރާގެ މެންބަރ ކުރެއްވި ސުވާލަކަށް ޖަވާބު ދެއްވަމުން މިނިސްޓަރ ޑރ.އަލީ ހައިދަރު ވިދާޅުވީ ގުޅީފަޅުންދޫކުރަން ހަމަޖެހިފައިވާ ގޯތިތައް ދޫކުރެވޭނެ ވަކި ތާރީހެއް ދެންނެވެން ނެތްކަމަށާއި، ލަފާކުރެވެނީ ގޯތިދޫކުރަން ފެށޭނެ ކަމަށް ލަފާކުރެވެނީ އަންނަ އަހަރުގެ ސެޕްޓެމްބަރ މަހާ ހިސާބުގައި ކަމަށެވެ. ސަބަބެއްކަމަށް މިނިސްޓަރ ވިދާޅުވީ އަދިވެސް ގުޅީފަޅުގެ ބިން ހިއްކައި ނުނިމޭތީއާއި ތިލަމާލެ ބްރިޖުގެ މަސައްކަތަށް ގުޅީފަޅުގެ ބިމުގެ ބައެއް ބޭނުންކުރަމުންގެންދާތީ، ބުރިޖުގެ މަސައްކަތް ނިންމައި ސައިޓް ސާފުކުރެވޭނެކަމަށް ލަފާކުރާ ތާރީހަކީ އަންނަ އަހަރުގެ ސެޕްޓެމްބަރ މަސްކަމަށްވާތީ ކަމަށެވެ.
މިނިސްޓަރ ޑރ.އަލީ ހައިދަރު އިތުރަށް ވިދާޅުވީ ކުރީ ސަރުކާރުން ތައްޔާރުކޮށްފައި އޮތް ލޭންޑް ޔޫސް ޕްލޭނަކީ މީހުންނަށް ދިރިއުޅެވޭ ގޮތަށް ތައްޔާރުކޮށްފައި އޮތް ލޭންޑް ޔޫސް ޕްލޭނަކަށްވާތީ، އައު ލޭންޑު ޔޫސް ޕްލޭނެއް މިހާރު ތައްޔާރުކޮށްފައިވާކަމަށާއި ދެންއޮތީ އެ ލޭންޑްޔޫސްޕްލޭނާ ގުޅޭ ގޮތުން ގުޅީފަޅުން ގޯތި ލިބުނު މީހުންގެ ކޮމެންޓް ހޯދުމަށްފަހު ފާސްކުރާ މަރުހަލާގައިކަމަށެވެ.
މިނިސްޓަރ ޑރ.އަލީ ހައިދަރު އެހެން ވިދާޅުވިނަމަވެސް މިއަހަރުގެ އޭޕްރީލް މަހު ވަނީ ގުޅީފަޅުން ހިއްކަން ކަނޑައަޅާފައިވާ ބިން ހިއްކާ ނިންމާފައެވެ. އެހެންކަމުން ގޯތި ދޫކުރުމަށް ކުރިން ކަނޑައަޅާފައިވާބިން އޭޕްރީލްމަހު ވަނީ ހިއްކާ ނިންމާފައެވެ. ނަމަވެސް މިހާރު ގުޅީފަޅުން ހިއްކާ ނުނިމި އޮތީ މިސަރުކާރުން ގުޅީފަޅަށް އިތުރުކުރާ 85 ހެކްޓަރުގެ ބިމެވެ.
މިއަދުގެ ޖަލްސާގައި މިނިސްޓަރ ޑރ.އަލީ ހައިދަރު ވިދާޅުވީ މިސަރުކާރުން ގުޅީފަޅަށް އިތުރުކުރާ ބައިގެ ބިން ހިއްކަން ފެށޭނެ ތާރީހެއް އަދި ނޭނގޭ ކަމަށާއި، އެކަމާގުޅޭ މަޝްވަރާތައް ބިނާރާ ބެހޭ ވުޒާރާއިން މިހާރު އެމްޓީސީސީ އާއި ކުރަމުންދާ ގެންދާކަމަށް މައުލޫމާތު ލިބިފައިވާކަމަށެވެ.
