ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ ލީޑަރޝިޕް އިތުރުކުރުމުގެ ޕްރޮގްރާމަކީ އުޖާލާ މުސްތަޤުބަލަކަށް ގެންދިއުމަށް ސްޓެލްކޯގެ ފަސްނުޖެހޭ ވައުދު ދައްކުވައިދޭ ޕްރޮގްރާމެއް ކަމަށް އެ ކުންފުނީގެ މެނޭޖިންގ ޑިރެކްޓަރ ހުސެއިން ފަހުމީ ވިދާޅުވެއްޖެ އެވެ.
މި ޕްރޮގްރާމުގެ ނުވަވަނަ ބެޗް ނިމި، ބައިވެރިވި މުވައްޒަފުން އެނބުރި އައުމާ ގުޅިގެން ފަހުމީ މިހެން ވިދާޅުވެފައިވަނީ އެކްސް ގައި ކުރެއްވި ޕޯސްޓެއްގަ އެވެ. މި ޕޯސްޓުގައި ފަހުމީ ވިދާޅުވެފައިވަނީ މިހާތަނަށް 469 މުވައްޒަފުން މި ޕްރޮގްރާމް ފުރިހަމަކޮށް، އުޖާލާ މުސްތަޤުބަލެއްގެ މަގު ހަރުދަނާކޮށްފައިވާ ކަމަށެވެ.
ގިރިފުށީ ޓްރޭނިންގ ސެންޓަރުގައި ކުރިއަށްގެންދެވުނު މި ޕްރޮގްރާމުގެ ނުވަވަނަ ބެޗްގައި ބައިވެރިވި 51 މުވައްޒަފުން ސަލާމަތުން އެނބުރި އައުމާ ގުޅިގެން ފަހުމީ ވަނީ އުފާފާޅުކުރައްވާފަ އެވެ. އަދި ޕްރޮގްރާމް ނިންމުމުގެ ރަސްމިއްޔާތުގައި ބައިވެރިވެ ވަޑައިގެން އަގުހުރި އެއްބާރުލުން ދެއްވި މިނިސްޓަރ އޮފް ސްޕޯޓްސް، ފިޓްނަސް އެންޑް ރިކްރިއޭޝަން، އަބްދުﷲ ރަފީއުއަށް ޝުކުރު އަދާކުރައްވާފައިވެ އެވެ.
މި ޕްރޮގްރާމަކީ ވަރުގަދަ ލީޑަޝިޕެއް އާލާކޮށް، އުޖާލާ މުސްތަޤުބަލަކަށް ގެންދިއުމަށް ސްޓެލްކޯގެ ފަސްނުޖެހޭ ވައުދު ދައްކުވައިދޭ ޕްރޮގްރާމެއް ކަމަށް ފަހުމީ ވިދާޅުވެފައިވެ އެވެ. އަދި ރާއްޖޭގައި ޒުވާނުންގެ ތަރައްޤީއަށް ދެއްވި ހިތްވަރާއި ތަޞައްވުރުވެރި ޚިދުމަތްތެރިކަމަށްޓަކައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ޝުކުރު އަދާކުރައްވާފައިވެ އެވެ.
މި ޕްރޮގްރާމަކީ ސްޓެލްކޯގެ މުވައްޒަފުންގެ ލީޑަރޝިޕް ހުނަރުތައް އިތުރުކޮށް، ކުންފުނީގެ މުސްތަޤުބަލް އުޖާލާކުރުމަށް ކުރެވޭ މުހިންމު މަސައްކަތެއްގެ ގޮތުގައި ފާހަގަކުރެވެ އެވެ.
