ރިސޯޓުތަކަށް އަންނަ ޓޫރިސްޓުންގެ ކޮންމެ ބޮލަކަށް 500 ޑޮލަރު މާރުކުރަން މަޖުބޫރުކުރުމަކީ ފޭރުން ކަމަށް ދ.މީދޫ ދާއިރާގެ މެންބަރު އަހުމަދު ސިޔާމް މުޙައްމަދު (ސަން ސިޔާމް) ވިދާޅުވެއްޖެ އެވެ.
ރާއްޖެ ޓީވީގެ "ފަށާއިރު" ޕްރޮގްރާމުގައި ވާހަކަފުޅު ދައްކަވަމުން ސިޔާމް ވިދާޅުވީ ޓޫރިޒަމް އިންޑަސްޓްރީއަށް އަސަރުކުރާ ގޮތަށް ގެންނަ ބަދަލުތަކުގެ ނުރަނގަޅު އަސަރު އެ އިންޑަސްޓްރީގައި ވިޔަފާރި ކުރަމުންދާ ފަރާތްތަކަށް ކުރަމުންދާކަމަށާއި، އެގޮތުން ޑޮލަރު މާރުކުރުމަށް މަޖުބޫރުކުރުމުން އެކަމުގެ އަސަރު ވަރަށް ބޮޑަށް އެ އިންޑަސްޓަރީގެ ވިޔަފާރިތަކަށް ކުރަނެ ކަމަށެވެ. ފޭރުން ސިފަކޮސްދެއްވަމުން ސިޔާމް ވިދާޅުވީ އެ ބޭފުޅުންގެ އަތުގައި އޮންނަ އަގު ބޮޑުއެއްޗެއް ގެ ބަދުލުގައި އަގު ހެޔޮ އެއްޗެއް ލިބިގަތުމަށް މަޖުބޫރުކުރުމަކީ ފޭރުންކަމަށެވެ.
މިހާރު ކިހިނެއްތޯ ތިބޭފުޅާ އަތުގައި އޮތް ހަލާލު އެއްޗެއް. އޮވެފައި ތިމަންނަ ބޭނުމޭ ލަކުޑި ބުރިއެއް، ކަލޭ ކަލޭ އަތުގައި އޮތް ރަންބުރި ދޭށޭ ތިމަންނައަށް. އެއީއެއް ނޫންތޯ މި ބުނާ އެއްޗަކީ. އަޅުގަނޑުމެންގެ ހަލާލު ފައިސާއެއް ނޫންތޯ އެއީ. ކިހިނެއްތޯ އަޅުގަނޑުގެ އޮތް އެއްޗެއް އަތުލަން ދިމާކުރަނީ. އެއަށް ކިޔާނީ ފޭރުން. އެ ފޭރިގެންނެއް ނުވާނެ އިނގޭތޯ
އެ ޕްރޮގްރާމުގައި ވާހަކަ ދައްކަވަމުން ސިޔާމް ވިދާޅުވީ ސަން ގެ ރިސޯޓު ތަކުގައި މަސައްކަތްކުރާ މުވައްޒަފުންނަށް މުސާރަ ދެނީ ޑޮލަރުން ނަމަވެސް ކުރިއަށް އޮތްތަނުގައި މުވައްޒަފުންނަށް މުސާރަ ދޭން ޖެހޭނީ ދިވެހި ރުފިޔާއިން ކަމުން ޑޮލަރުމާރުކުރަން މަޖުބޫރުކުރުމުގެ ސަބަބުން ވިޔަފާރިވެރިންނަށާއި ވިޔާފާރިތަކަށް ގެއްލުން ވުމުގެ އިތުރަށް އެ އިންޑަސްޓްރީގައި މަސައްކަތްކުރާ މުވައްޒަފުންނަށް ވެސް ގެއްލުން ވާނެ ކަމަށެވެ.
އަޅުގަނޑުމެންނަށް ކުރެވޭނެ ކަމެއް ނޫން މީކީ 500 ޑޮލަރު ބޮލެއްގެ މައްޗަށް އެކްސްޗޭންޖު ކުރުމަކީ ކުރެވޭނެ ކަމެއް ނޫން. ކުރެވޭނެ ކަންތައްތަކުގެ ވާހަކަ އަޅުގަނޑުމެން ކައިރީ ދެއްކީމައި އެކަން ކުރެވޭނެ. އެހެން ނަމަވެސް މަޖުބޫރުކޮށްފިއްޔާ އެކަން ކުރަން މަޖުބޫރު ވާނެ. ދެން އަހަރަމެން ކުންފުނިތާ ހަލާކު ވާނީ
ބޭރުފައިސާ މާރުކުރުމުގެ ޤަވާއިދަށް އެމްއެމްއޭ އިން ގެނައި ބަދަލު ޤާނޫނުގައި ހިމެނުމަށް ސަރުކާރުން މިހާރުވަނީ ބިލެއް ރައްޔިތުންގެ މަޖިލިސް އަށް ފޮނުވާފައެވެ. އަދި އެބިލު އެމްއެމްއޭ އިން ތައްޔާރުކޮށްދެއްވީތީ އެކަމަށް ރައީސް ޑރ.މުއިއްޒުވަނީ ޝުކުރުއަދާކުރައްވާފައެވެ.
