އަލިފާނުގެ ހާދިސާގައި ގެއްލުންވި 3 މިނިސްޓްރީވެސް ދާއިމީ ހައްލެއް ލިބެންދެން ހިންގާނީ ތަނެއް ކުއްޔަށް ނުނަގައި ސަރުކާރުގެ އިމާރާތްތަކުގައިކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެއެވެ.
އެމަނިކުފާނު އެހެން ވިދާޅުވީ އަލިފާނުގެ ހާދިސާގައި ގެއްލުންވި 3 މިނިސްޓްރީގެ މަސައްކަތްތައް ދަރުބާރުގޭގައި ހިންގަމުން އަންނަ ގޮތް ބައްލަވާލުމަށް ދަރުބާރުގެއަށް ވަޑައިގެން 3 މިނިސްޓްރީގެ މުވައްޒަފުންނާ ބައްދަލުކޮށް ދެއްކެވި ވާހަކަފުޅުގައެވެ. އެ މަނިކުފާނުގެ ވާހަކަފުޅުގައި ވިދާޅުވީ ދަރުބާރުގޭގައި މިހާރު ހިންގަން ފަށާފައިވާ 3 މިނިސްޓްރީ ވެސް ވީހާވެސް އާންމު ހާލަތަކަށް އޮފީސް މާހައުލު ހެދުމަށްޓަކައި ސަރުކާރުގެ މުވައްސަސާތަކާ ގުޅިގެން މަސައްކަތްތަކެއް ކުރައްވަމުންދާކަމަށެވެ.
އެގޮތުން ދަރުބާރުގޭގައި ފާހާނަ އިތުރުކުރުމަށާއި، ކެފެޓީރިއާގެ ޚިދުމަތް ދިނުމަށާއި، ދެންވެސް މަދުވާ އިލެކްޓްރޯނިކްސް، ކޮމްޕިއުޓަރ ސިސްޓަމްފަދަ ތަކެތި ހޯއްދެވުމަށް މަސައްކަތްތަކެއް ކުރައްވަމުންދާކަމަށްވެސް އެމަނިކުފާނު ވިދާޅުވިއެވެ. އަދި އަލިފާނުގެ ހާދިސާގައި އިމާރަތް ނެތިދިޔަ 3 މިނިސްޓްރީ ހިންގުމަށް ދާއިމީ ހައްލެއް ލިބެންދެން ތަނެއް ކުއްޔަށް ނުހިފުމަށް ނިންމާފައިވާކަންވެސް އެމަނިކުފާނު ވަނީ ވިދާޅުވެފައެވެ. އެގޮތުން ދާއިމީ ހައްލެއް ލިބެންދެން ސަރުކާރުގެ ތަނެއްގައި މިނިސްޓްރީތަކުގެ ޚިދުމަތް ދިނުމަށް ވިސްނަވާފައިވާކަމުގައިވެސް އެމަނިކުފާނު ވިދާޅުވިއެވެ.
