ގުޅިފަޅާއި ތިލަފުށީ ފަޅަށް ދޫކޮށްލާފައިވާ ކަނޑު އުޅަނދުތައް ނަގައި، ނީލަމުގައި ވިއްކައިލަން ނުވަތަ ނައްތައިލުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ނިންމައި އެކަމާ ބެހޭ އުސޫލެއް އާއްމުކޮށްފި އެވެ.
އެޗްޑީސީން މިދިޔަ ބުރާސްފަތިދުވަހު، ސަރުކާުރުގެ ގެޒެޓްގައި ޝާއިއުކުރި އުސޫލުގައިވާ ގޮތުން ގުޅިފަޅާއި ތިލަފުށި ފަޅުގައިވާ އުޅަނދުތައް، އެއީ ދޫކޮށްލާފައިވާ ތަކެތި ކަމަށް ކަނޑައަޅާނީ ވަކި ކަންތައްތަކަކަށް ބަލައިގެންނެވެ. އެގޮތުން ބަލާނެ އެއް ކަމަކީ އުޅަނދެއް އޮތީ ފަޅުގެ އެ ސަރަހައްދު ބޭނުންކުރާ މީހުންނަށް އުނދަގުލަކަށްވާ ގޮތަށްތޯ ނުވަތަ ނޫންތޯ އެވެ. ބަލާނެ އަނެއް ކަމަކީ އެ އުޅަނދެއް އޮތީ މަޝްރޫއެއް ހިންގަން ކަނޑައަޅާފައިވާ ސަރަހައްދެއްގައި އެކަމަށް ދަތިވާ ގޮތަށްތޯ ނުވަތަ ނޫންތޯ އެވެ.
އެ އުޅަނދެއްގެ ސަބަބުން އެ ސަރަހައްދުގެ ތިމާވެށްޓަށް ގެއްލުން ވާ ނަަމަ، އެއީ ވެސް އުޅަނދު ދޫކޮށްލާފައިވާ ކަމަށް ކަނޑައެޅޭނެ ސަބަބެއް ކަމަށް އެޗްޑީސީގެ އުސޫލުގައި ވެ އެވެ. އުޅަނދު ބާއްވަން ޖެހޭ ގޮތް ނޫން ގޮތަކަށް ބާއްވާފައި އޮތުމާއި އެއްބައި ނުވަތަ އެއްކޮށް ފެތިފައި އޮތުމަކީ ވެސް އެ އުޅަނދެއް ދޫކޮށްލާފައިވާ ކަމަށް އެޗްޑީސީން ކަނޑައަޅާނެ ސަބަބެކެވެ.
އެޗްޑީސީގެ އުސޫލުގައިވާ ގޮތުން، ދޫކޮށްލާފައިވާ ކަމަށް ކަނޑައަޅާ އުޅަނދުތައް ވެސް ނަގައި ނައްތައިލުމުގެ ނުވަތަ ނީލަން ކިއުމުގެ ކުރިން އެ އުޅަނދެއްގެ ވެރިފަރާތުން އުޅަނދު ނަގައިގެން އެހެން ތަނަކަށް ގެންދަން ހަތް ދުަވަހާއި 30 ދުވަހާ ދެމެދުގެ މުހުލަތެއް ދޭނެ އެވެ. ނައްތައިލާނީ ނުވަތަ ނީލަމުގައި ވިއްކައިލާނީ އެ މުހުލަތު ހަމަވުމަށް ފަހުގަ އެވެ.
ވެރިފަރާތް ނޭނގޭ އުޅަނދުތަކުގެ ވެރިފަރާތް ހޯދަން އެޗީސީން އިއުލާނު ކުރާނެ އެވެ. އެގޮތަށް އިއުލާނު ކުރުމަށް ފަހުގައި، ވެރިއަކު ވޭތޯ ބަލަން މަޑުކުރާނީ ވެސް 30 ދުވަހުގެ މުއްދަތަކަށެވެ.
އެޗްޑީސީން ނަގައި ނައްތައިލާ ނުވަތަ ނީލަމުގައި ވިއްކައިލާ އުޅަނދު ފަހަރާ މެދު އަމަލުކުރި ގޮތުގެ ފުރިހަމަ ރެކޯޑް، އެކޯޕަރޭޝަނުން ބަލަހައްޓާނެ އެވެ. އެގޮތުން އެކުލަވައިލާ ރިޕޯޓްގައި އުޅަނދު އޮތް ގޮތުގެ ފޮޓޯތައް ވެސް އާ އުސޫލުގައިވާ ގޮތުން ހިމަނާނެ އެވެ.
ތިލަފުށްޓާއި ގުޅިފަޅަށް ދޫކޮށްލާފައިވާ ގިނަ އަދަދެއްގެ ބާ އުޅަނދު ފަހަރުގެ މައްސަލަ އަކީ ޒަމާންވީ ބޮޑު މައްސަލަ އެކެވެ. ތިލަފުށީގައި ހިންގި ބައެއް މަޝްރޫއުތައް އެފަދަ އުޅަނދު ތަކުގެ ސަބަބުން ލަސްކުރަން ވެސް ޖެހުނެވެ.
