މަތިވެރި ރީތި އަންހެނަކު ފާހިޝް ކަމަކަށް ދައުވަތު ދިނުމުން އެކަމަށް އިންކާރު ކުރާ މީހާއަށް މަޙުޝަރު ދުވަހުން މާތް ﷲ އަރުޝީގެ ހިޔާވަހިކަން ދެއްވާނެ ކަމަށް މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ހުކުރު ޚުތުބާގެ މައުޟޫއަކީ "މަޙްޝަރުދުވަހުގެ ހޫނުން ރައްކާތެރިވާށެވެ!" އެ ޚުތުބާގައި ވަނީ މަޙުޝަރުގައި އަރުޝީގެ ހިޔާވަހިކަން ލިބޭމީހުންގެ ވާހަކަ ބަޔާންކޮށްފައެވެ. އެގޮތުން ހަތް ބާވަތެއްގެ މީހުންނަށް އެ ދުވަހު އަރުޝީގެ ހިޔާވަހިކަން ލިބޭނެކަމަށް ޚުތުބާގައި ބުންޏެވެ.
ފާހިޝް ކަމަކަށް އެދުމުން އިންކާރު ކުރާ މީހުންގެ ވާހަކަ ވެސް ބަޔާން ކޮށްފައިވަނީ މި މީހުންގެ ތެރޭގައެވެ.
އޭގެ ތެރޭގައި ހިމެނެނީ،
- އަދުލުވެރި އިމާމުން
- އޭނާގެ ވެރި ރަސްކަލާންގެއަށް އަޅުކަންކުރުން މަތީ ބޮޑުވި ޒުވާނާ
- މިސްކިތަށް ހިތް ޖެހިފައިވާ މީހާއާއި،
- ﷲ ގެ ވަޖުހުފުޅަށްޓަަކައި އެކަކު އަނެކަކު ދެކެ ލޯބިވެ، އެކުގައި އުޅެ، އެގޮތުގައި ވަކިވެ ދިޔަ ދެ މީހުން
- ހަސަބާއި ނަސަބުން މަތިވެރި، ރީތި އަންހެނަކު، ފާހިޝް ކަމަކަށް ދައުވަތު ދިނުމުން އަހުރެން ﷲ ދެކެ ބިރުގަނެއޭ ބުނެ އެކަމާ ދުރުހެލިވާ މީހާ
- ކަނާއަތުން ސަދަގާތްކުރި އެއްޗެއް ވާއަތަށް ވެސް ނޭނގޭ މިންވަރަށް ވަންހަނާ ކުރި މީހާ
- އެކަނި އިނދެ ﷲ ގެ މަތިން ހަނދުމަކޮށް ކަރުނަ އޮހޮރި މީހާ އެވެ.
އަދުލުވެރި ވެރިޔާގެ ވާހަކަ ބަޔާންކޮށް ހަދީޘް ބަސްފުޅެއްގެ ދަލީލުގައި ޚުތުބާގައި ބުނީ، އަދުލުވެރި ވެރިންގެ ވާހަކަ ފުރަތަމަ ބަޔާން ކޮށްފައިވަނީ ވެރި މީހާ ރަނގަޅުވެއްޖެ ނަމަ އެ ގައުމުގެ ރައްޔިތުން ރަނގަޅުވާނެތީ ކަމަށެވެ. އަދި ވެރި މީހާ ހިންގުންތެރި ވެއްޖެ ނަމަ ގައުމު ފާގަތިވެ އާންމު ވާނެތީ ކަމަށް ވެސް ޚުތުބާގައި ބުނެފައިވެއެވެ.
އަޅުކަމުގެ މަތީގައި ބޮޑުވި ޒުވާނާއަށް އަރުޝީގެ ހިޔާވަހިކަން ލިބެނީ އޭނާގެ ފުރާވަރުގެ އުމުރުގައި ހަވާ ނަފުސުގެ ގޮވުންތަކަށް އިޖާބަ ނުދީ ﷲ ގެ އަމުރުފުޅުތަކާއި ނަހީތަކަށް އިޖާބަދިން ޒުވާނާއަކީ ﷲ އަށް ތެދުވެރި ޒުވާނަކަށް ވާތީ ކަމަށް ވެސް ޚުތުބާގައި ބުންޏެވެ.
"އިލްމުވެރިން ވިދާޅުވާ ގޮތުގައި، މިސްކީނުންނަށާއި، ފަޤީރުންނަށް އަޅައިނުލާ މުޖުތަމައެއްގައި، ފާޅުކޮށް ސަދަޤާތް ކުރުމަކީ މީހުންނަށް އެކަމަށް ހިތްވަރުދިމައްޓަކައި ކުރަން އެދެވިގެންވާ ކަމެކެވެ. މިއާ ޚިލާފަށް ފަގީރުންނާ މިސްކީނުންނަށް ހެޔޮ ފޯރުވާ މުޖުތަމައެއްގައި، ރަނގަޅު ގޮތަކީ ސަދަގާތް ވަންހަނާ ކުރުމެވެ،" ޚުތުބާގައި ބުންޏެވެ.
އިތުރަށް ޚުތުބާގައި ވަނީ މަޙުޝަރުގެ ބިރުވެރިކަން ކިޔައިދީ، އެ ދުވަހު ހަމައެކަނި ލިބޭނެ ހިޔާއަކީ އަރުޝީގެ ހިޔާކަން ކަމުގައި ފާހަގަކޮށްފައެވެ.
