ރާއްޖޭގައި މިއަދު ފާހަގަ ކުރަމުން އަންނަ ޝަހީދުންގެ ދުވަހާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހި ގައުމާ މުހާތަބް ކުރައްވާ ގޮތަށް ހަމަޖެހިއްޖެއެވެ.
އެމަނިކުފާނު ގައުމާ މުހާތަބް ކުރައްވަން ހަމަޖެހިފައިވަނީ މިއަދު ހެނދުނު 10:00 ޖަހާއިރެވެ.
ޝަހީދުންގެ ދުވަހުގެ މުނާސަބަތުގައި، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ ޚިޠާބު، 1 ޝަޢުބާން 1445 (11 ފެބްރުއަރީ 2024) ވާ އާދީއްތަދުވަހު ހެނދުނު 10 ޖަހާއިރު، ދިވެހިރާއްޖޭގެ އަޑު، ޓީވީ މޯލްޑިވްސް އަދި ރާއްޖޭގެ މީޑިއާތަކުން ދުރަށް ފޮނުވާނެ.
— The President's Office (@presidencymv) February 10, 2024
ޝަހީދުންގެ ދުވަސް ފާހަގަކުރަނީ ގައުމަށްޓަކައި ޝަހީދުވެ ގޮސްފައިވާ ގައުމީ އަބްތާލުންގެ ހިދުމަތްތަކުގެ ހަނދާންކޮށް، އެ އަބްތާލުންގެ ޒިކުރާ އާކުރުމަށެވެ. ޝައުބާން މަހުގެ 1 ވަނަ ދުވަސް ރާއްޖޭގެ ޝަހީދުންގެ ދުވަހުގެ ގޮތުގައި ފާހަގަކުރަމުން އަންނައިރު، އެ ދުވަހަކީ ދިވެހި ގައުމާއި މިނިވަންކަންމުގެ ދިފާއުގައި ހަނގުރާމަ ކުރައްވަނިކޮށް އައްސުލްޠާން ޢަލީ 6 ވަނަ ސިރީ އައުދަ ސިޔާކަ ކައްތިރި ބަވަނަ މަހާރަދުން ނުވަތަ އަލިރަސްގެފާނު ޝަހީދުވެވަޑައިގެންނެވި ދުވަހެވެ.
އެރަސްކަލުން ރަސްކަމަށް އިސްވެވަޑައިގަތީ މީގެ 458 އަހަރު ކުރިން، މީލާދީން 1،558 ވަނަ އަހަރުއެވެ. އެއީ ހިޖުރައިން 965 ވަނަ އަހަރެވެ.
ޝަހީދުންގެ ދުވަސް އެންމެ ފުރަތަމަ ފާހަގަ ކުރަން ފެށީ 1980 ގައެވެ.
