ސީ ޕްލޭންގައި އެއާ އެމްބިއުލާންސްގެ ހިދުމަތް ވަރަށް އަވަހަށް ފެށިގެން ދާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރާއްޖޭގައި ފުރަތަމަ ފަހަރަށް އެއާ އެމްބިއުލާންސްގެ ހިދުމަތް އިއްޔެ ފަށާފައިވާއިރު، ސަރުކާރުން މިހާރު ތައްޔާރުވަމުން ދަނީ މޫދަށްޖައްސާ ބޯޓު މެދުވެރިކޮށް ސީ އެމްބިއުލާންސްގެ ހިދުމަތް ދިނުމަށެވެ.
ރައީސުލްޖުމްހޫރިއްޔާ މިއަދު ރ.އަތޮޅު އަލިފުއްޓަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަދައްކަވަމުން ވިދާޅުވީ ކުރިއަށް އޮތް ތިނެއް ނުވަތަ ހަތަރު ހަފްތާގެ ތެރޭގައި މޫދަށްޖައްސާ ބޯޓު މެދުވެރިކޮށް އެއާ އެމްބިއުލާންސްގެ ހިދުމަތް ފެށިގެންދާނޭ ކަމަށެވެ. ރައީސް ވިދާޅުވީ މޫދަށްޖައްސާ ބޯޓުގައި އެއާ އެމްބިއުލާންސްގެ ހިދުމަތް ފެށުމުން އެއާޕޯޓް ނެތް ރަށްރަށަށް ކުއްލި ހާލަތުގައި ބަލިމީހުން އުފުލުމުގެ ހިދުމަތް ދެވިގެންދާނޭ ކަމަށެވެ.
"އެއާ އެމްބިއުލާންސްގެ ގޮތުގައި ޑޭޝް 8 މަރުކާގެ ބޯޓަކާއި ސީ ޕްލޭނެއް ދުއްވާނެ. މި ދެ އުޅަނދު ދުއްވުމުން ދެން އަޅުގަނޑު މެންނަށް އަމިއްލަ ކެޕޭސިޓީގައި މިކަން ކުރެވޭގޮތް މިވީ. ދެންހުރި މުހިއްމު ކަންކަމުގައިވެސް މި ބަލަނީ އަޅުގަނޑުމެންގެ އަމިއްލަ ފައިމައްޗަށް ތެދުވެވޭތޯ" ރައީސް ޑރ.މުއިއްޒު ވިދާޅުވިއެވެ.
President Dr @MMuizzu met with the community of Alifushi Island in the North Maalhosmadulu Atoll, where he reiterated the Administration’s commitment to resolving the challenges faced. pic.twitter.com/2rCp8XOejU
— The President's Office (@presidencymv) March 2, 2024
ރައީސް ވިދާޅުވީ ރައްޔިތުން އެމަނިކުފާނާ ހަވާލުކުރި ޒިއްމާ ފުރިހަމަޔަށް އަދާކުރަން ބޭނުންވާ ކަމަށާއި، އެގޮތުން އެކަން ކުރެވޭނީ ގާނޫނު ހަދާ މަޖިލީހުގެ ތެރެއިންވެސް ސަރުކާރަށް އެއްބާރުލުން ލިބިގެންކަން އެމަނިކުފާނުގެ ވާހަކަފުޅުގައި ވަނީ ފާހަގަކުރައްވާފައެވެ.
އަލިފުއްޓަށް މި ސަރުކާރުން ގެންނަންހުރި ތަރައްގީއާ ގުޅޭގޮތުން ރައީސް ވަނީ އެރަށުގެ އެއާޕޯޓް އެޅުމަށް ބިން ހިއްކާއިރު، ތަރައްޤީގެ މަސައްކަތް ކުރުމަށް އިތުރަށް ބިންހިއްކާނޭކަމަށް ވިދާޅުވެފައެވެ. މިގޮތުން ދެން އަލިފުއްޓަށް އަންނަންޖެހޭ ތަރައްޤީ ނައިސް ހުއްޓިފައި ނޯންނާނޭކަމަށް ރައީސް ވިދާޅުވިއެވެ.
