ރަޝިއާގެ ކަޒާންގައި މިހާރު ކުރިއަށްދާ 16 ވަނަ ބްރިކްސް ސަމިޓުގައި މެމްބަރު ގައުމުތަކުގެ ލީޑަރުން އެއްތަނަކަށް އެއްވެ ދުނިޔޭގެ ބޮޑެތި މައްސަލަތަކާ ބެހޭ ގޮތުން މަޝްވަރާ ކޮށްފިއެވެ.  ބްރެޒިލް، ރަޝިޔާ، އިންޑިޔާ، ޗައިނާ އަދި ދެކުނު އެފްރިކާ އެކުވެގެން އުފެއްދި ބްރިކްސްއަކީ ބައިނަލްއަޤްވާމީ ވިޔަފާރީގެ ދާއިރާއާއި ޖިއޮޕޮލިޓިކްސް ބައްޓަންކުރުމުގައި މުހިންމު ދައުރެއް އަދާކުރާ އޯގަނައިޒޭޝަނަކަށް ވަނީ ވެފައެވެ. އެހެންކަމުން އެ އޯގަނައިޒޭޝަންގައި މުހިއްމު ގިނަ ގައުމުތަކަކުން މިހާރު ދަނީ ބައިވެރިވަމުންނެވެ. އެގޮތުން މިސްރު، އިތިއޯޕިއާ، އީރާން، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް ފަދަ އާ ގައުމުތައް ވަނީ އެ އޯގަނައިޒޭޝަނުގެ މެންބަރުންނަށް ވެފައެވެ. އެހެންކަމުން ދުނިޔޭގެ ޖިއޯ ޕޮލިޓިކްސް ގައި ބްރިކްސް މިހާރުވަނީ ނުފޫޒް ގަދަ އޯގަނައިޒޭޝަނަކަށް ވެފައެވެ. އަދި ރަޝިޔާ، އިންޑިއާ، ޗައިނާ، އަދި ބްރެޒިލް އިސްވެ އުފައްދައި އެ އޯގަނައިޒޭޝަން ފުޅާކުރަމުން ދިއުމާ ގުޅިގެން ކަންބޮޑުވާ ބޮޑެތި ގައުމު ތަކެއްވެސް އެބަހުއްޓެވެ. އެ ފަރާތްތަކުގެ ކަންބޮޑުވުމަކީ އެމެރިކާ އާއި ނުވަތަ ޔޫރަޕާ ދެކޮޅު ބާރުވެރިކަމެއް އުފެދި އެމެރިކާ ޢާއި ޔޫރަޕުން ދުނިޔޭގައި ކުރަމުން އަންނަ ރަސްކަން ނިމުމަކަށް ގެނެސްފާނެކަމުގެ ބިރެވެ. ބްރިކްސް އަކީ ކޮބައި ހެއްޔެވެ؟ ބްރިކްސްއަކީ ބްރެޒިލް، ރަޝިއާ، އިންޑިއާ، ޗައިނާ އަދި ދެކުނު އެފްރިކާ ރަމްޒު ކޮށްދޭ އަކުރުތަކެވެ. އެ ގައުމުތައް އެކުވެގެން އުފައްދާފައިވާ އޯގަނައިޒޭޝަން އެކެވެ. ބްރިކްސްް މި ލަފުޒު އެންމެ ފުރަތަމަ ތައާރަފްކުރީ 2001 ވަނަ އަހަރު ގޯލްޑްމަން ސެކްސް އިން "ދަ ވޯލްޑް ނީޑްސް ބެޓާ އިކޮނޮމިކް ބްރިކްސް" ގެ ނަމުގައި ނެރުނު ގްލޯބަލް އިކޮނޮމިކްސް ޕޭޕަރުގަ އެވެ. ބްރެޒިލް، ރަޝިއާ، އިންޑިއާ އަދި ޗައިނާ އަކީ ކުރިއަށް އޮތް 50 އަހަރުގެ ތެރޭގައި ދުނިޔޭގެ އެންމެ ބޮޑެތި އިގްތިސާދުތަކުގެ ގޮތުގައި ފެންނާނެ ކަމަށް އެ ރިޕޯޓުގައި ވަނީ ލަފާކޮށްފަ އެވެ. އެ ޖަމާއަތް ނުރަސްމީކޮށް ފެށުނީ 2006 ވަނަ އަހަރު ރަޝިއާ، އިންޑިއާ އަދި ޗައިނާގެ ލީޑަރުން ސެއިންޓް ޕީޓާސްބާގްގައި ބައްދަލުކުރެއްވި ހިސާބުންނެވެ. އެއީ 2009 ވަނަ އަހަރު ރަޝިއާގެ ޔެކަޓެރިންބާގްގައި ބޭއްވި "ބްރިކްް" ގެ، ރަސްމީކޮށް ބޭއްވި ފުރަތަމަ ސަމިޓެވެ. އޭރު އެ ޖަމާއަތުގެ ނަމަކީ "ބްރިކް" އެވެ. ސަބަބަކީ "އެސް" އަކުރު ރަމްޒުކޮށްދޭ ސައުތުއެފްރިކާ ބްރިކް އާއި ގުޅުނީ 210 ވަނަ އަހަރުކަމަށްވާތީއެވެ. އެހެންކަމުން ސައުތުއެފްރިކާ ބްރިކް އާއި ގުޅުމުން "ބްރިކް" ގެ ނަން "ބްރިކްސް" އަށް ވަނީ ބަދަލުކޮށްފައެވެ. މިސްރު، އިތިއޯޕިއާ، އީރާން، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް 2024 ވަނަ އަހަރު ބްރިކްސް އާއި އަލަށް ވަނީ ގުޅިފައެވެ. އެއާއެކު ބްރިކްސް ގެ ބާރާއި ނުފޫޒު ދުނިޔޭގައި މިހާރުވަނީ ވަރަށްބޮޑަށް ގަދަވެ ފުޅާވެފައެވެ. އެހެންކަމުން ބްރިކްސް އަކީ މިހާރު ދުނިޔޭގެ އާބާދީގެ ދެބައިކުޅަ އެއްބައި އަދި ދުނިޔޭގެ އިގްތިސާދުގެ ހަތަރުބައިކުޅަ އެއްބައި ތަމްސީލުކުރާ ޖަމާއަތެކެވެ. ބްރިކްސް ސަމިޓް 2024 އެއްމެ ބޮޑަށް ހާއްސަވީ އެއްކަމަކީ މިސްރު، އިތިއޯޕިއާ، އީރާން، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް (ޔޫއޭއީ) އިން ބައިވެރިވާ ފުރަތަމަ ސަމިޓަށް ވެފައި ދުނިޔޭގެ އައު ބާރެއް އުފެދެމުންދާކަން ބައިނަލް އަގްވާމީގޮތުން މިހާރު ޔަގީން ކުރެވިފައިވާތީއާއި އެ ސަމިޓް ގައި އިތުރަށް ބްރިކްސް ގެ ނުފޫޒް ފުޅާކުރުމާ ގުޅޭގޮތުންނާއި، ވިޔަފާރީގެ ދާއިރާއާއި ސަލާމަތާއި މޫސުމަށް އަންނަ ބަދަލުތަކާ ބެހޭ ގޮތުން އިންޑިއާގެ ރައީސް ނަރެންދުރަ މޯދީ އާއި، ރަޝިޔާގެ ރައީސް ވްލަޑިމިއާ ޕޫޓިން އާއި ޗައިނާގެ ރައީސް ޝީ ޖިންޕިން ބައްދަލުކުރައްވައި، ކުރައްވާފައިވާ މަޝްވަރާތަކުގެ ސަބަބުންނެވެ. ބްރިކްސް ސަމިޓް 2024 ވަނީ ހުޅަނގުގެ އަޣުލަބިއްޔަތު އޮންނަ އޯގަނައިޒޭޝަން ތަކަށް ވާދަވެރި އޯގަނައިޒޭޝަނަކަށް ވެފައިވާކަން ސާބިތުކޮށްދީފައެވެ. އަދި ދުނިޔޭގެ ދެކުނު ބިތުގެ ގައުމުތަކުގެ އުންމީދުތައް ވަރަށްބޮޑަށް ބުރިކްސް ގެ މައްޗަށް ބަރޯސާވާން ފަށާފައިވާކަންވެސް އެ ސަމިޓުން ވަނީ ދައްކުވާ ދީފައެވެ. އެގޮތުން މިހާރުވެސް 30 އަށްވުރެ ގިނަ ޤައުމުން މެންބަރުކަމަށް ކުރިމަތިލާފައިވާއިރު، މި ސަމިޓުން ފާހަގަކުރެވެނީ ތަރައްޤީވަމުން އަންނަ ޤައުމުތަކުގެ މެދުގައި ބްރިކްސް އަށް ކުރާ އިތުބާރު ވަރަށްބޮޑަށް މައްޗަށް ގޮސްފައިވާކަމެވެ. އަދި ބްރިކްސް މިހާރު ވެފައިވަނީ  ވޯލްޑް ބޭންކާއި އިންޓަނޭޝަނަލް މަނިޓަރީ ފަންޑް ފަދަ ހުޅަނގުގެ ބާރު ގަދަ މުއައްސަސާތަކުގެ އެއްމެ ބޮޑު ވާދަވެރިޔާ ކަމަށެވެ. ދުނިޔޭގެ އެކި ކަންކޮޅުތަކުގައި ޖިއޮޕޮލިޓިކަލް ނުތަނަވަސްކަން އިތުރުވަމުންދާއިރު، ކުރިއަރަމުން އަންނަ އިޤްތިޞާދުތަކުގެ މެދުގައި މަޝްވަރާކޮށް އެއްބާރުލުން ދިނުމުގެ ޕްލެޓްފޯމެއްގެ ގޮތުގައި ބްރިކްސް ވަނީ މުހިއްމު ކާމިޔާބީތަކެއް ހޯދާފައެވެ. އެ ސަމިޓުގައި މަލްޓިޕޯލާ ދުނިޔެއެއް ކުރިއެރުވުމަށާއި ހުޅަނގުގެ އިސްތިއުމާރާ ދެކޮޅަށް މަސްލަހަތު ފާޅުކުރަން މަސައްކަތްކުރާ ގައުމުތަކަށް އަޑު އުފުލުމުގައި ބްރިކްސްގެ ދައުރު ދައްކުވައިދީފައިވެއެވެ. ބްރިކްސްގެ އަމާޒަކީ ހުޅަނގުގެ ބާރު ގަދަ މުއައްސަސާތަކަށް ގޮންޖެހުން ތައް ކުރިމަތިކުރުވުން ހެއްޔެވެ؟ ބްރިކްސްގެ އަމާޒަކީ އިންކްލޫސިވް އިކޮނޮމިކް ކޯޕަރޭޝަން ޕްރޮމޯޓްކޮށް ތަރައްގީވަމުން އަންނަ ގައުމުތަކަށް މުހިންމު މައްސަލަތަކަށް ހައްލު ހޯދައިދިނުމާއި، އެމެރިކާ ޢާއި ޔޫރަޕުން ދުނިޔޭގައި ހިންގަމުންއަންނަ ބާރާއި ނުފޫޒް ގެ ބަދަލުގައި އެހެން އޮނިގަނޑެއް އެކުލަވާލައި، މެމްބަރު ގައުމުތަކަށް މަޝްވަރާކޮށް، އެ ގައުމުތަކުގެ ޝަރުތުތަކާ އެއްގޮތަށް އެއްބާރުލުން ދިނުމުގެ ފުރުސަތު ފަހިކޮށްދިނުމެވެ. އެހެންކަމުން މިހާރު އެމެރިކާ އާއި ޔޫރަޕުން ދުނިޔޭގައި ކުރަމުންއަންނަ ރަސްކަމުގެ ބާރު މަޑުމަޑުން ނެތެންފަށާފައިވާކަމުގެ ސާބިތު ހެއްކެއްގެ ގޮތުގައި ބްރިކްސް ވަނީ ވެފައެވެ. އަދި ދުރު ނޫން މުސްތަޤްބަލެއްގައި ބްރިކްސް އަކީ ދުނިޔޭގައި އޮތް އެއްމެ ނުފޫޒު ގަދަ އޯގަނައިޒޭޝަނަށް ވުމުގެ ފުރުސަތު ވަރަށްބޮޑުކަމަށް މާހިރުން ވަނީ ލަފާކޮށްފައެވެ.