ރައީސް ޔާމީން އާ ބައްދަލުކޮށްފަވާތީ އިހަވަންދޫ ކައުންސިލްގެ ރައީސް އަޙްމަދު ސޮބާހް ޕީއެންސީ ޕްރައިމަރީއަށް ޝަރުތުހަމަނުވާކަމަށް ނިންމާފައިވާ ކަމަށް މިނިވަން އަށް މައުލޫމާތު ލިބިއްޖެ އެވެ.

އަންނަ އަހަރުގެ މާރިޗް މަހު ބާއްވާ ލޯކަލް ކައުންސިލްތަކުގެ އިންތިހާބުގައި ޕީއެންސީގެ ޓ ިކެޓްގައި އިހަވަންދޫ ކައުންސިލަށް ކުރިމަތިލާން ބޭނުންވާ ފަރާތްތަކަށް ހުޅުވާލި ފުރުސަތުގައި އިހަވަންދޫ ކައުންސިލްގެ މިހާރުގެ ރައީސް އަހްމަދު ސޮބާހް ވެސް ވަނީ އާ ދައުރަކަށް އިހަވަންދޫ ކައުންސިލްގެ ރައީސް ކަމަށް ޕީއެންސީގެ ޓިކެޓްގައި ވާދަކުރުމަށް ނަން ހުށަހަޅާފައެވެ.

އަހްމަދު ސޮބާހް އަކީ މިވަގުތު އިހަވަންދޫގައި ޕީއެންސީގެ މަސައްކަތްތަކުގައި އެންމެ އިސްކޮށް އުޅުއްވާ ފަރާތް ނަމަވެސް މިދިޔަ ނޮވެމްބަރު 14 ވަނަ ދުވަހު އެ ޕާޓީން މާލޭގައި ބޭއްވި ބޮޑު އެއްވުމުގައި ބައިވެރިވުމަށް މާލެ އައި ދަތުރުގައި ރައީސް ޔާމީން އާއި އޭނާ ބައްދަލުކުރިކަމަށް އެ ޕާޓީގެ އެކްޓިވިސްޓުން ވަނީ ތުހުމަތު ކޮށްފައެވެ. އަދި އޭނާ ޕީއެންސީ ޕްރައިމަރީގައި ވާދަކުރުމަށް ޝަރުތު ހަމަނުވާކަމަށް ނިންމީ އެކަމާ ގުޅިގެން ކަމަށްވެސް ބައެއް އެކްޓިވިސްޓުން މިނިވަން އަށް މައުލޫމާތު ދީފައި ވެއެވެ. ބުނަމުންނެވެ.

އަދި އެ ތުހުމަތު އެގޮތަށް ކޮށްފައިވަނިކޮށް، ސަރުކާރުގެ ސްޓޭޓް މިނިސްޓަރުގެ މަގާމުގައި ހުރި އޭނާގެ ކޮށްކޮ ސުޖާއު އާއި އިހަވަންދޫ ހެލްތު ސެންޓަރުގެ މެނޭޖަރުގެ މަގާމުގައި ހުރި އޭނާގެ ދައްތަ ސަހްމާ ކުއްލިގޮތަކަށް ސަސްޕެންޑް ކުރިކަމަށްވެސް މިނިވަންއަށް ވަނީ މައުލޫމާތު ލިބިފައެވެ. ނަމަވެސް އޭގެ ދުވަސްތަކެއް ފަހުން އެ ދެފަރާތް އަލުން ވަޒީފާއަށް އަނބުރާ ނެރެފައިވާ ކަމަށްވެސް މައުލޫމާތު ލިބިފައި ވެއެވެ.

ކުއްލިގޮތަކަށް އިހަވަންދޫ ކައުންސިލް ރައީސް ސޮބާހް ޕީއެންސީ ޕްރައިމަރީ ގައި ވާދަކުރުމަށް ޝަރުތު ހަމަނުވާކަމަށް ނިންމި ނިންމުމާ ގުޅިގެން އެ ޕާޓީގެ އިހަވަންދޫ އެކްޓިވިސްޓުންގެ މެދުގައި ވަނީ ހިޔާލުތަފާތުވުންތައް އުފެދިފައެވެ.

މި ކަމާގުޅިގެން އިހަވަންދޫ ޕީއެންސީ އެކްޓިވިސްޓުންގެ މެދުގައި ހިޔާލުތަފާތުވުންތައް އުފެދިފައިވާއިރު ސޮބާހް ގެ ޝަރުތު ހަމަނުވާކަމަށް ކަނޑައެޅި ސަބަބެއް ކަމަށް ބައެއް އެކްޓިވިސްޓުން ބުނީ ސޮބާހް އަކީ ޕީއެންސީގެ ޓިކެޓްގައި ރައްޔިތުންގެ މަޖިލީހަށް ވާދަކޮށްފާނެ ފަރާތަކަށްވާތީ މިހާރުގެ މަޖިލިސްމެންބަރު ސޮބާހުގެ ސިޔާސީ ކުރިުމަގަށް ހުރަސްއަޅަން ކޮށްފައިވާ ކަމެއް ކަމަށެވެ. އެގޮތުން ސޮބާހްއަކީ ރައީސް ޔާމީނަށް ވަފާތެރި މީހެއްކަމަށް ޕީއެންސީގެ ވެރިންނަށް މިހާރުގެ މެންނަރު ދަނީ ވިސްނައިދެމުންކަމަށްވެސް އެފަރާތްތަކުން ބުނެއެވެ.