ގާނޫނު އަސާސީން ލިބިދޭ ހަނުހުރުމުގެ ހައްގަކީ އެމީހެއްގެ އަމިއްލަ ރުހުމާ ނުލާ އެމީހެއް އަމިއްލަ ނަފްސުގެ މައްޗައް ބަޔާންދީގެން އެމީހާ އަށް ލިބިދާނެ ގެއްލުންތަކުން ސަލާމަތް ކުރުމަށް ދެވިފައިވާ ހައްގެކެވެ. އާންމުކޮށް ޖިނާއީ އަދުލުގެ ނިޒާމުގައި ހަނުހުރުމުގެ ހައްގު ތަހުގީގައި އަދި ކޯޓުގައި ބޭނުން ކުރަނީ ކްރައިމްސީނުން ހައްޔަރުކުރެވޭ މީހުންނާއި އަދި ވަރަށް ބޮޑެތި ހެކިތައް އެމީހާ އާއި ދެކޮޅަށް ހުންނަ ފަރާތްތަކެވެ. މިފަހުން މަރުކޮމިޝަނަށް އާންމުކުރި މައުލޫމާތަށް ބަލާއިރު ރިލްވާން ގެއްލުވާލުމުގައި އުޅުނު ގިނަފަރާތްތަކާއި ރައީސް ޔާމީން ގާތް ގުޅުމެއް އޮތްކަން ހާމަވެއެވެ. ރިލްވާން ގެއްލުވާލެވުނީ ސީދާ ރައީސް ޔާމީންގެ އޯޑަރަށް ކަމުގައި ނުވިޔަސް އެއަށް ފަހު އެކަން ކުރިމީހުން ރައީސް ޔާމީނަށް އެތައް ކަމެއް ފީޑް ކޮށްގެން އެތައް ކަމެއް ރައީސް ޔާމީނު ކޮށްފައި ވާކަމުގެ ހެކިތައް ވަނީ ލިބިފައި ކަމަށް މަރުކޮމިޝަނުން ވަނީ ޕްރެސް ކޮންފަރެންސް ގައި ވިދާޅުވެފައެވެ.

ރައީސުލްޖުމްހޫރިއްޔާކަން ކޮށްފައި ހުރިމީހެއް ހަނުހުރުން !

ރައީސް ޔާމީނަކީ ހުރިހާ ދިވެހިންގެ މަސްލަހަތު ހިމާޔަތްކުރަން މާތް ﷲ ގަންދީ ހުވާކޮށްގެން ހުރި ފަރާތަކަށް ވީއިރު ދިވެހި ރައްޔިތެއް ގެއްލިގެން އުޅޭ މައްސަލައެއްގައި އަދި ރައީސް ޔާމީނަށް އެތައް ތުހުމަތެއް ކުރެވޭ މައްސަލައެއްގައި ހަނުހުރުމަކީ އާދައިގެ ކަމެއްނޫނެވެ. ތަހުގީގަކީ އެމިހެއްގެ ދިފާއުގައި ވާހަކަ ދައްކާ އަދި އެނގިހުރި މިންވަރަކުން ތިމާއަށް އެމައްސަލައިގައި އިނގޭ މައުލޫމާތެއްދީ އަދި އަމިއްލަ ދިފާއުގައި ހެކި ހުށަހަޅަން ވެސް ލިބޭ ފުރުސަތެކެވެ. އަދި އެމަނިކުފާނުގެ ވެރިކަމުގައި ދިވެހި ދަރިއަކު ވަގައްނަގައި މަރާލައިގެން އުޅޭ މައްސަލައެއްގެ ތަހުގީގަށް އެއްބާރުލުން ދިނުމަކީ ގައުމުގެ ރައީސް ކަން ކޮށްފައި ހުރި މީހެއްގެ ގައުމީ ވާޖިބެކެވެ. އަދި ޒިންމާއެކެވެ. ރައީސް ޔާމީނު ހަނުހުރުމުން ދޭހަވަނީ އެމައްސަލައިގައި ރައީސް ޔާމީނު އެތައް ކަމެއް ފޮރުވަން ބޭނުންފުޅުވާކަމެވެ. ނުވަތަ އެމަނިކުފާނުގެ މައްޗައް ހުރިހެކިތަކުން އެމަނިކުފާނު ދޭބަޔާން އެސާބިތު ހެކިތަކާއި ފުށުއަރާނެތީ ޖެހިލުންވުމެވެ. އަމިއްލަ އެކައުންޓަށް ފައިސާ ވަދެފައިވާ ވޮޑަމުލާ ފަދަ މައްސަލަތަކުގެ ތަހުގީގު ތަކުގައި ހަނު ނުހުންނަވާ ޖަވާބުދާރީވެފައި، ރިލްވާން މައްސަލައިގައި ހަނުހުރުމަކީ ވަރައްގިނަ ހަގީގަތްތައް އޭގައި ފޮރުވިފައި ވާނޭކަމަށް ބެލެވިދާނެ ކަމެކެވެ. ރިލްވާން ގެއްލުމައްފަހު ރައީސް ޔާމީނާ ފުރަތަމަ މީޑިއާއިން ރިލްވާން ގެއްލިގެން އުޅޭ މައްސަލަޔާމެދު ސުވާލު ކުރުމުން ދެއްވި ރުންކުރު ފަރުވާކުޑަ ޖަވާބުތަކާއި ރިލްވާން އާއިލާއިން އާދޭސް ކުރުމުންވެސް އެއާއިލާޔާއި ބައްދަލުނުކުރެއްވުމާއި ކެބިނެޓް ވައިބަރ ގްރޫޕް ގައި ހޯމްމިނިސްޓަރު އުމަރު ނަސީރަށް ރިލްވާން މައްސަލަ އެހާމުހިއްމު މައްސަލައެއްގެ ގޮތުގައި ނުބަލައި މަޑުޖައްސާލަން އެންގުމާކީ ވެސް ސުވާލު އުފެދޭ ކަމެކވެ.

ރައީސް ޔާމީން އަށް ރިލްވާން ވަގަށްނަގާ މަރާލި ގޮތް އެކަމުގައި ބައިވެރިވީ މީހަކު ކިޔައިދިނުން!

ރިލްވާން ގެއްލުވާލިކަމަށް މަރުކޮމިޝަނުން ބުނާ މީހަކު 2017 ވަނަ އަހަރު ރައީސް ޔާމީން އާއި ބައްދަލުކޮށް އެމީހާގެ ބައިވެރިވުން ފިޔަވާ ހުރިހާ ތަފްސީލެއް ރައީސް ޔާމީނަށް ކިޔައިދިންކަމުގެ ހެކި މަރުކޮމިޝަނަށް ލިބިފައިވާކަމަށް އެ ކޮމިޝަނުން ވަނީ ބުނެފައެވެ. 2018 ވަނަ އަހަރުގެ ރިޔާސީ އިންތިހާބުގެ ކެމްޕޭނުގައި ރައީސް ޔާމީން ރުޅިގަދަވެގެން ވާހަކަ ދައްކަމުން ރިލްވާން ވަނީ މަރުވެފައޭ ވިދާޅުވެވުނީ އެމަނިކުފާނުގެ ސަބްކޮންޝަސް މައިންޑް އިން ވިސްނަމުން އެމީހަކަށް އެނގޭ މައުލޫމާތެއް ބޭއިހުތިޔާރުގައެވެ. އެހެންވެ އޭރުވެސް އެމަނިކުފާނަށް ރިލުވާން ވަނީ މަރާލާފަކަން އޭރުގައިވެސް އެނގޭކަމަށް އިތުރު ބާރުލިބިދެއެވެ. ރައީސް ޔާމީން ރިލްވާން މައްސަލައިގައި ހަނު ހުންނަވާފައި އެމައްސަލަ މަރުކޮމިޝަނުން ހާމަކުރިތާ 24 ގަޑިއިރުވީއިރުވެސް ރައީސް ޔާމީންގެ ހިލަމެއްނެތެވެ. ޕީޕީއެމް ލީޑަރޝިޕް އިން ޑިފެންސައް ވެއްޓިގެން ޕްރެސް ކޮންފަރަންސް ބާއްވާ އަދި ވަކީލުން އަބުރުގެ ދައުވާ ކުރާނެކަމަށް ބަޔާން ނެރިފައިވާއިރު ރައީސް ޔާމީން ހުންނެވީ އަދިވެސް ހަނުހުންނަވައިގެން ގެކޮޅުގައެވެ.