ރާއްޖޭގެ އިގްތިސާދު 2025 ވަނަ އަހަރު 6.4 އިންސައްތަކުރިއަރާނެ ކަމަށް ލަފާކޮށް 56,625.6 ބިލިއަން ރުފިޔާގެ ބަޖެޓެއް 2025 ވަނަ އަހަރަށް ހުށަހަޅައިފިއެވެ.
ފިނޭންސް މިނިސްޓަރ މޫސާ ޒަމީރު ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށަހަޅާފައިވާ އަންނަ އަހަރަށް ލަފާކުރާ ބަޖެޓަކީ މިހާތަނަށް ރާއްޖޭގައި ހުށަހަޅާފައިވާ އެއްމެ ބޮޑު ބަޖެޓެވެ. އަދި އެއްމެ ބޮޑުއަދަދެއް ޕީއެސްއައިޕީ ޕްރޮގްރާމް ތަކަށްވެސް ކަނޑައަޅާފައިވާ ބަޖެޓްކަން ފާހަގަކުރެވެއެވެ.
އަންނަ އަހަރަށް ލަފާކުރާ ބަޖެޓް ގައި އާމްދަނީގެ ގޮތުގައި ދައުލަތައް 37,201.6 ބިލިއަން ރުފިޔާ ލިބޭނެކަމަށް ލަފާކޮށްފައިވާއިރު ހިލޭ އެހީގެ ގޮތުގައި 2,590.4 ބިލިއަން ރުފިޔާ ލިބޭނެ ކަމަށް ލަފާކޮސްފައިވެއެވެ. އެހެންކަމުން ހިލޭ އެހީއާއި އާމްދަނީގެ ގޮތުގައި 2025 ވަނަ އަހަރު ދައުލަތައް ލިބޭނެކަމަށް ލަފާކޮށްފައިވަނީ 39,792.0 ބިލިއަން ރުފިޔާއެވެ.
އަންނަ އަހަރުގެ ބަޖެޓުން އެއްމެ ބޮޑު ޚަރަދެއް ކުރުމަށް ބަޖެޓް ކޮށްފައިވަނީ ރިކަރަންޓް ޚަރަދުތަކަށެވެ. އެގޮތުން ރިކަރަންޓް ޚަރަދުކުރުމަށް 35,814.3 ބިލިޔަން ރުފިޔާ ބަޖެޓްކޮށްފައިވާއިރު 2 ވަނައަށް އެއްމެ ބޮޑު އަދަދެއް ޚަރަދުކުރުމަށް ކަނޑައަޅާފައިވަނީ ކެޕިޓަލް ޚަރަދު ތަކަށެވެ. ކެޕިޓަލް ޙަރަދުތަކަށް 13,418.3 ބިލިޔަން ރުފިޔާ ކަނޑައަޅާފައިވާއިރު، ތަރައްގީގެ މަޝްރޫޢުތައް ހިންގުމަށް 12,414.5 ބިލިޔަން ރުފިޔާ ކަނޑައަޅާފައިވެއެވެ. އެގޮތުން އަންނަ އަހަރަށް ލަފާކުރާ ޖުމްލަ ޚަރަދަކީ 49,232.6 ބިލިޔަން ރުފިޔާ އެވެ.
އަންނަ އަހަރަށް ލަފާކޮށްފައިވާ ބަޖެޓްގައި އާމްދަނީ އިތުރުކޮށްގެން 4.9 ބިލިޔަން ރުފިޔާ ދައުލަތަށް އިތުރަށް ހޯދޭނެކަމަށް ލަފާކޮށްފައިވެއެވެ. އެގޮތުން އާމްދަނީ އިތުރުކުރުމަށް ރާވާފައިވާ ގޮތަތަކުގެ ތެރޭގައި ސިނގިރޭޓާއި ބިޑިން ނަގަމުންދާ އިމްޕޯޓް ޑިއުޓީގެ ރޭޓް ބޮޑުކުރުމާއި، އެއާޕޯޓް ޓެކުހާއި ފީގެ ރޭޓްތައް މަތިކުރުމާއި، ގްރީން ޓެކުހުގެ ރޭޓްތައް މަތިކުރުމާއި، އަމިއްލަ ފަރާތްތަކުން ބިން ހިއްކުމުގެ މަޝްރޫޢުތަކަށް ނަގާ ވެލިން ޑްރެޖިންގ ފީ އެއް ނެގުމާއި، ޖީއެސްޓީ ރޭޓް މަތިކުރުމާއި، ޖީއެސްޓީ ނިޒާމުގައި ޑެސްޓިނޭޝަން ޕްރިންސިޕަލް ފްރިހަމައަށް ތަންފީޒް ކުރުމާއި، ފްރިކްއެންސީ ސްޕެކްޓްރަމް ޗާޖެއް ނެގުން ހިމަނާފައިވެއެވެ.
އަންނަ އަހަރަށް ހުށަހަޅާ ބަޖެޓްގައި ޚަރަދުތައް ކުޑަކުރުމަށް ވެސް ފިޔަވަޅުތަކެއް ހިމަނާފައިވެއެވެ. އެގޮތުން އެ ފިޔަވަޅުތައް އަޅައިގެން އަންނަ އަހަރު ދައުލަތުގެ ޚަރަދުތަކުން 6.6 ބިލިއަން ރުފިޔާ ކުޑަކުރެވޭނެކަމަށްވެސް ލަފާކޮށްފައިވައެވެ.
އެގޮތުން އެޅުމަށް ކަނޑައަޅާފައިވާ ފިޔަވަޅުތަކުގެ ތެރޭގައި ސްބްސިޑީގެ ނިޒާމް ޑައިރެކްޓް ސަބްސިޑީޫ ނިޒާމަކަށް ބަދަލުކުރުމާއި، އާސަންދަ ނިޒާމް މުރާޖައާ ކުރުމާއި، ތެލުގެ އަގަށް އަންނަ ބަދަލުން ކުރިމަތިވާ ފިސްކަލް އަދި އެކްސްޓާނަލް ސެކްޓަރގެ ހީރާސްތައް ހެޖްކުރުމާއި، ދައުލަތުގެ ޕެންޝަން ސްކީމްތައް ރިވައިސް ކުރުމާއި، ސަރުކާރު ހިއްސާވާ ކުންފުނިތައް ރިފޯމް ކުރުން ހިމެނެއެވެ.
އަންނަ އަހަރަށް ލަފާކުރާ ބަޖެޓް ގައި ތަރައްގީގެ މަސްރޫއުތަކަށް 12.4 ބިލިއަން ރުފިޔާ ކަނޑައަޅާފައިވާއިރު އޭގެ ތެރެއިން 1.5 ބިލިއަން ރުފިޔާ ކަނޑައަޅާފައިވަނީ ބޯހިޔާވަހިކަމުގެ މަޝްރޫޢުތައް ހިންގުމަށެވެ. އަދި އޭގެ އިތުރުން 5 އިންސައްތަ އިންޓަރެސްޓް ރެޓްގައި 2 ބިލިއަނާ 4 ބިލިއަނާ ދެމެދުގެ ލޯނު ބޯހިޔާވަހިކަމާ ގުޅުންހުރި ދާއިރާއިން ފޯރުކޮށްދިނުމަށްވެސް ކަނޑައަޅާފައިވެއެވެ.
