ދެމެހެއްޓެނިވި ގޮތެއްގައި ކުނި މެނޭޖްކުރަން ރާއްޖޭގައި ކުރާ މަސައްކަތް އިތުރަށް ހަރުދަނާކުރަން އެހީތެރިވުމުގެ ގޮތުން ޖަޕާނުން ރާއްޖެއަށް 80 މިލިޔަން ރުފިޔާގެ ހިލޭ އެހީއެއް ދީފި އެވެ.
ޖަޕާނުގެ އިކޮނޮމިކް އެންޑް ސޯޝަލް ޑިވެލޮޕްމެންޓް ޕްރޮގްރާމްގެ ދަށުން ރާއްޖެއަށް އެ އެހީ ދިން ކަމުގެ ނޯޓުގައި ދެގައުމުން ސޮއިކުރީ ފޮރިން މިނިސްޓްރީގައި މިއަދު ބޭއްވި ރަސްމިއްޔާތެއްގަ އެވެ. އެ ނޯޓުގައި ރާއްޖޭގެ ފަރާތުން ސޮއިކުރެއްވީ ފޮރިން މިނިސްޓްރީގެ ސްޓޭޓް މިނިސްޓަރު އަހުމަދު ހަލީލެވެ. ޖަޕާނުގެ ފަރާތުން ސޮއިކުރެއްވީ އެގައުމުގެ ފޮރިން މިނިސްޓްރީގެ ސްޓޭޓް މިނިސްޓަރު ޓަކައި ޝުންސުކޭ އެވެ.
ސުންޝުކޭ ރާއްޖެއަށް ވަޑައިގަތީ ޖަޕާނާއި ރާއްޖެއާ ދެމެދު ސިޔާސީ ގުޅުން ގާއިމްކުރިތާ 50 އަހަރު ފުރުން ފާހަގަކުރުމުގެ ގޮތުން ކުރެއްވި ހާއްސަ ޒިޔާރަތެއްގެ ގޮތުގަ އެވެ.
Maldives 🇲🇻 and Japan 🇯🇵 signs Exchange of Notes for a Grant Aid of ¥700 Million (Approx. MVR 80 million) to enhance sustainable waste management capabilities in the Maldives, under the Economic & Social Development Programme.@MofaJapan_en @JapaninMaldives pic.twitter.com/U3PVdjeFr5
— Ministry of Foreign Affairs 🇲🇻 (@MoFAmv) December 19, 2022
ދެމެހެއްޓެނިވި ގޮތަކަށް ކުނި މެނޭޖްކުރުމަކީ ރާއްޖޭގައި އަދިވެސް އެހާ ހަރުދަނާ ގޮތެއްގައި ކުރެވެމުން ނުދާ ކަމެކެވެ. އެހެން ނަަމަވެސް އެކަން ހަރުދަނާ ކުރަން ބައިނަލް އަގުވާމީ އެކިއެކި ފަރާތްތަކުގެ އެހީގައި ރާއްޖޭން އަންނަނީ ގިނަ މަސައްކަތްތަކެއް ކުރަމުންނެވެ. ތިމާވެށްޓަށް ވަރަށް ބޮޑަށް ގެއްލުންވާ ގޮތަކަށް ތިލަފުށީގައި ކުރަމުން އައި ކުނި މެނޭޖްކުރުމުގެ މަސައްކަތްތަކަށް މިހާރު ވަނީ ބޮޑެތި ބަދަލުތަކެއް ގެނެސްފަ އެވެ.
ޖަޕާނާއި ރާއްޖެއާ ދެމެދު ސިޔާސީ ގުޅުން ގާއިމްކުރި ފަހުން މިވީ 50 އަހަރުގެ ތެރޭގައި އެގައުމުން ވަނީ ރާއްޖޭގެ ތަރައްގީއަށް އެކި ގޮތް ގޮތުން ގިނަ އެހީތަކެއް ދީފަ އެވެ.
