"އަވިކަތަ" ޕްރޮގްރާމްގެދަށުން ސޯލާ ޕެނަލް ސިސްޓަމް ހަރުކުރުމަށް، ގޭގޭގެ ފުރާޅު ކުއްޔައް ހިފަން ސްޓެލްކޯއިން ހުޅުވާލައިފިއެވެ.
އަވިން ހަކަތަ އުފެއްދުމުގެ މި ޕްރޮގްރާމުގައި އާންމުން ބައިވެރިވެގެން އާމްދަނީ ލިބޭނެ ފުރުސަތު މިހާރު ސްޓެލްކޯއިން ވަނީ ހުޅިވާލާފައެވެ. މި ޕްރޮޖެކްޓް ކުރިއަށްގެންދާނީ އާއްމުންގެ ގޭގޭގެ ފުރާޅު ސްޓެލްކޯއިން ކުއްޔަށް ނަގާ، ސޯލާ ޕެނަލް ހަރުކޮށް ކަރަންޓު އުފައްދާގޮތަށެވެ.
އަވިކަތަ: ތެލަށް ބަރޯސާވާ މިންވަރު ކުޑަކޮށް، ސަރުކާރުގެ ނެޓްޒީރޯ އަމާޒަށް ވާސިލްވުމަށް ހުޅުވުނު ދޮރެއް. ކަސްޓަމަރުންގެ ފުރާޅު ކުއްޔަށް ދީގެން ކޮންމެ މަހަކު އާމްދަނީއެއް ހޯދުމުގެ ފަހި ފުރުސަތެއް. އަދި ކުންފުންޏާއި، ކަސްޓަމަރަށްވެސް ތިމާވެށި ހިމާޔަތް ކުރުމުގައި ހިއްސާވެވޭނެ މަގެއް. pic.twitter.com/bcvf9p20SX
— STELCO (@STELCOMALDIVES) May 6, 2023
ސްޓެލްކޯއިން ބުނީ ހަރުކުރާ ކޮންމެ 1 ކިލޯވޮޓްގެ ސޯލާ ޕެނެލަކަށް 180.60 ރުފިޔާ، ކުލީގެ ގޮތުގައި ސްޓެލްކޯއިން ގޭގެއަށް ދައްކާނެކަމަށެވެ. އަދި ސޯލާ ޕެނަލް ހަރުކުރުމުގެ ހުރިހާ މަސައްކަތްތަކާއި ހަރަދެއް ބަލަހައްޓާނީ ސްޓެލްކޯއިންކަމަށެވެ.
އެ ޕްރޮގްރާމް ގައި ބައިވެރިވާ ސޯލާ ޕެނަލް ހަރުކުރާ ފުރާޅުގައި މަދުވެގެން 100 އަކަފޫޓުގެ ހުސްޖާގަ އޮންނަންޖެހެއެވެ. އަދި ފުރާޅުގައި މަދުވެގެން 150 ކިލޯގެ ބަރުދަން އުފުލޭނެހައި ވަރު ހުންނަންޖެހޭނެކަމަށް ސްޓެލްކޯއިން ބުންޏެވެ.
މީގެއިތުރުން ފަސޭހައިން އިރުގެ އަވިލިބޭ ތަނެއްގައި ހުރި ތަނަކަށްވުމާއި ޕެނަލް އަދި އިންސްޓޮލޭޝަން ވަސީލަތްތައް ހަރުކުރެވޭނެ ޖާގަ ހުންނަ ތަނަކަށް ވާންޖެހޭ ކަމަށް ސްޓެލްކޯއިން ބުންޏެވެ.
"އަވިކަތަ" ޕްރޮގްރާމަށް ފުރާޅު ކުއްޔަށް ދޭން ބޭނުންވާ ފަރާތްތަކުން ސްޓެލްކޯއާއި ގުޅައިގެން އެކަން ކުރިއަށްގެންދިއުމަށް އެ ކުންފުނިން އެދެ އެވެ. އެ ޕްރޮގްރާމް މާލެ ސަރަޙައްދުގެ އިތުރުން، އެ ކުންފުނިން ޚިދުމަތްދޭ އެހެން ރަށްތަކުގައިވެސް ކުރިއަށްގެންދާނެ ކަމަށް ސްޓެލްކޯއިން ބުންޏެވެ.
