ހުޅުމާލޭ ދެވަނަ ފިޔަވައްސާ ދިމާލުން މިރޭ ހަވާ އަރުވާނެ ކަމަށް އެމްއެންޑީއެފް އިން ބުނެފިއެވެ.
އެމްއެންޑީއެފް އިން ކުރި ޓްވީޓެއްގައި ބުނީ މިރޭ 2200 ގައި، ހުޅުމާލެ ދެވަނަ ފިޔަވަހީގެ ފަރުކޮޅުފުއްޓާ ދިމާ ބޭރު މޫދު ސަރަހައްދުގައި ހަވާ އެރުވުމަށް ވަނީ ހަމަޖެހިފައި ކަމަށެވެ. ވިޔަފާރި އުސޫލުން ޕްރައިވެޓް އިވެންޓަކަށް ސިފައިންގެ ކޯޕަރޭޓިވް (ސިފްކޯ) އިން ކުރިޔަށްގެންދާ މި ހަރަކާތް ކުރިއަށް ދާނީ 3 މިނެޓެއްހާއިރަށް ކަމަށް ވެސް އެމްއެންޑީއެފް އިން ބުނެފައިވެއެވެ.
މިރޭ 2200 ގައި، ހުޅުމާލެ ފޭސް 2ގެ ފަރުކޮޅުފުއްޓާ ދިމާ ބޭރު މޫދު ސަރަހައްދުގައި ހަވާ އެރުވުމަށް ވަނީ ހަމަޖެހިފައެވެ. ވިޔަފާރި އުސޫލުން ޕްރައިވެޓް އިވެންޓަކަށް ސިފައިންގެ ކޯޕަރޭޓިވް (ސިފްކޯ) އިން ކުރިޔަށްގެންދާ މި ހަރަކާތް ކުރިއަށް ދާނީ 3 މިނެޓެއްހާއިރުއެވެ.
— Maldives National Defence Force (@MNDF_Official) June 23, 2023
މިރޭ ހަވާ އަރުވަނީ ޕްރައިވެޓް އިވެންޓަކަށް ކަމަށް ބުނެ، އިތުރު އެހެން މައުލޫމާތެއް އެމްއެންޑީއެފުން ދީފައެއް ނުވެއެވެ.
މީގެ ކުރިން ރާއްޖޭގައި އާއްމުކޮށް ހަވާ އަރުވަނީ ދައުލަތުން ފާހަގަކުރާ ބޮޑެތި މުނާސަބާތަކާ ގުޅުވައިގެން ކަމަށް ވިޔަސް، ސިފްކޯ އިން މިހާރު އަންނަނީ ވިޔަފާރި އުސޫލުން އާއްމުންނަށް އެ ހިދުމަތް ފޯރުކޮށްދެމުންނެވެ.
ހަވާ އެރުވުމަށް އާއްމު ގޮތެއްގައި މިނެޓަކަށް 1000 ޑޮލަރު (ގާތްގަނޑަކަށް -/15000 ރުފިޔާ) ސިފްކޯ އަށް ދައްކަން ޖެހެއެވެ. އެހެންކަމުން މިރޭ ހަވާ އެރުވުމަށް ބައިލައްކައެއްގައި ރުފިޔާ ހޭދަކުރާނެ ކަމަށް ބެލެވެއެވެ.