އެމެރިކާއިން ފުރަތަމަ ފަހަރަށް ދޫނި ރޯގާ ޖެހިގެން މަރުވެއްޖެއެވެ. އެމެރިކާގެ ލޫޒިއާނާގެ ސިއްހީ އިދާރާތަކުން ބުނެފައިވަނީ މަރުވެފައިވަނީ ދޫނި ރޯގާ ޖެހިގެން ހޮސްޕިޓަލުގައި އެޑްމިޓްކޮށްފައިވާ މީހެއް ކަމަށެވެ. މިދިޔަ ޑިސެމްބަރު މަހުގެ ކުރީކޮޅު ސިއްހީ އިދާރާތަކުން ވަނީ އެ ކޭސް އަކީ އެ ގައުމުގައި ދެނެގަނެވުނު އިންސާނުންނަށް އެޗް5އެން1 ވައިރަހުގެ ފުރަތަމަ ސީރިއަސް ކޭސްގެ ގޮތުގައި ފާހަގަކޮށްފަ އެވެ. ނަމަވެސް މިހާތަނަށް އެފަދަ އިތުރު ކޭސްއެއް ފެނިފައި ނުވާ ނުވާތީ އިންސާނުންގެ ތެރޭގައި ބަލި ފެތުރުމުގެ ނުރައްކާ ކުޑަކަމަށް ލޫޒިއާނާގެ ހެލްތު ޑިޕާޓްމަންޓުން ނެރެފައިވާ ބަޔާނުގައި ބުނެފައިވެއެވެ. އެޗް5އެން1 ގެ ފުރަތަމަ ކޭސް 1996 ވަނަ އަހަރު ފެނުނު ނަމަވެސް 2020 ވަނަ އަހަރުން ފެށިގެން ދޫނި ބަކަރިތަކާއި މެމަލް ބާވަތްތަކުގެ މެދުގައި އެ ވައިރަސް ވަނީ މިއުޓެންޓްވެ ފެތުރެން ފަށާފައެވެ. ޖެނެޓިކް ސީކުއެންސިންގައި އެނގުނު ގޮތުގައި ލުއިޒިއާނާ ގެ ބަލި މީހާއަށް ޖެހުނު އެޗް5އެން1 ވައިރަހުގެ ވާޝަން އަކީ އެމެރިކާގެ އެކި ކަންކޮޅުތަކުގައި ހުރި ގިނަ ޑެއިރީ ޖަނަވާރުތަކާއި ދަނޑުތަކުން ފެނުނު ވައިރަހާ ތަފާތު ވައިރަހެކެވެ. މިހާތަނަށް އެމެރިކާއިން އެޗް5އެން1 އަށް 67 މީހަކު ވަނީ ޕޮޒިޓިވްވެފައެވެ. އެމެރިކާގެ ސެންޓަރ ފޮރ ޑިޒީޒް ކޮންޓްރޯލް އެންޑް ޕްރިވެންޝަންއިން ހާމަކޮށްފައިވާ ގޮތުގައި މި 67 މީހުންގެ ތެރެއިން ޖަނަވާރުން އެކްސްޕޯޒްވުމުގެ ރެކޯޑެއް ނެތީ އެންމެ ދެ ޕޭޝަންޓުންނަށެވެ. އެހެންކަމުން ޖަނަވާރުންނާ ކޮންޓެކްޓް ނުވާ ފަރާތްތަކަށް ވައިރަސް އެރިގޮތް މިހާރު ދަނީ ހޯދަމުންނެވެ.