ރައީސްގެ ވައުދާ އެއްގޮތައް ރަމްޞާން މަހަށް ރާއްޖޭގެ ގޭބީސީ ތަކަށް ހަދީޔާކުރާ މަސްދަޅުން 40 ގްރާމް އުނި ނުވާނެކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީން ބުނެފިއެވެ.

ކުރިއަށް އޮތް ރޯދަ މަހާ ދިމާކޮށް ސަރުކާރުން ރައްޔިތުންނަށް ހަދިޔާ ކުރާ މަސްދަޅުން 40 ގްރާމް މަދުކޮށް މަސްދަޅު ތައްޔާރުކުރާކަމަށްބުނެ މީސްމީޑިއާގައި ދައުރުވަމުންދާ ވާހަކަތާކާ ގުޅިގެން މިފްކޯއިން ބުނީ ރައީސްގެ ޑރ. މުހައްމަދު މުއިއްޒުގެ ވައުދާ އެއްގޮތަށް ރޯދަޔަށް ގޭބިސީތަކަށް ހިލޭ ބަހާ މަސްދަޅުން 40 ގްރާމް މަސް އުންޏެއް ނުވާނެ ކަމަށާއި 40 ގްރާމް އުނިކޮށް މަސްދަޅު ތައްޔާރުކުރަމުންދާކަމަށްބުނެ ދައުރުކުރަނީ  ދޮގުވާހަކަ ތަކެއް ކަމަށެވެ.

ރައީސްގެ ވައުދުފުޅާ އެއްގޮތަށް ރޯދަޔަށް ގޭބިސީތަކަށް ހިލޭ ބަހާ މަސްދަޅުން 40 ގްރާމް މަސް އުންޏެއް ނުވާނެ. ފަތުރަމުން ދަނީ ދޮގު ވާހަކަތަކެއް. 140g ބާޒާރަށް ނެރުނީ ކުދި ގޭބިސީތަކަށް އަދި އެއްފަހަރު ބޭނުންކުރެވޭ އެއްޗެއްގެ ގޮތުގައި. މަސް ދަޅު ފްރިޖު ކުރުމަކީ ރަނގަޅު ކަމަކަށް ނުވާތީ

އެ ކުންފުނިން ބުނީ ކުރިން ނެރެމުން އައި 180 ގްރާމްގެ މަސްދަޅުގެ ބަދަލުގައި 140 ގްރާމް މަސްދަޅު ބާޒާރަށް ނެރުނީ ކުދި ގޭބިސީތަކަށް އަމާޒުކޮށްގެން އެއްފަހަރު ބޭނުން ކުރެވޭ އެއްޗެއްގެ ގޮތުގައި ހެދުމަށް ކަމަށާއި އެކަން އެގޮތައް ކުރީ މަސް ދަޅު ފްރިޖު ކުރުމަކީ ރަނގަޅު ކަމަކަށް ނުވާތީ ކަމަށެވެ. އެގޮތުން އަލަށް ނެރުނު 140 ގްރާމްގެ މަސްދަޅު މިހާރު ރީޓެއިލްކޮށާއި ހޯލްސޭލްކޮށް ވެސް ލިބޭނެ ކަމަށް މިފްކޯ އިން ބުންޏެވެ.