ޕެރިސް ކްލައިމެޓް އެއްބަސްވުމުން އެމެރިކާ ވަކިވާން ނިންމެވިކަން އެމެރިކާގެ އާ ރައީސް ޑޮނާލްޑް ޓްރަމްޕް އިއުލާނު ކުރެއްވުމާ ގުޅިގެން މޫސުމީ ބަދަލުތަކުން ކުރަމުންދާ ނޭދެވޭ އަސަރުތައް ދެކިލެއްވުމަށް ރާއްޖެ ވަޑައިގަތުމުގެ ދައުވަތު ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ ހައިސިއްޔަތުން، ކުރީގެ ރައީސް މުހައްމަދު ނަޝީދު އެމެރކާގެ ރައީސް ޑޮނާލްޑް ޓްރަމްޕް އަށް އަރުވައިފިއެވެ.

ޕެރިސް ކްލައިމެޓް އެއްވަސްވުމުން އެމެރިކާ ވަކިވާން ނިންމެވުމާގުޅިގެން ކްލައިމެޓް ވަލްނަރަބަލް ފޯރަމް (ސީވީއެފް) އިން ނެރެފައިވާ ބަޔާނުގައި ބުނެފައިވަނީ އެމެރިކާއިން ޕެރިސް ކްލ؛ައިމެޓް އެއްބަސްވުމުން އެކަމާ ހިތާމަކުރައްވާ ކަމަށާއި، ބޮޑެތި ގައުމުތަކުން ތިމާވެއްޓަށް ދެމުންދާ ގެއްލުންތައް ކުޑަކުރުމަށް ހަދާފައިވާ ޕެރިސް އެގްރީމެންޓަކީ، މުސޫމީ ބަދަލުތަކުގެ ނޭދެވޭ އަސަރުތައް ތަހައްމަލު ކުރަމުންދާ ތަރައްގީވަމުން އަންނަ ކުދި ގައުމުތަކަށް ލިބުނު އުއްމީދެއް ކަމަށެވެ.

އެ ބަޔާނުގައި އިތުރަށް ބުނެފައިވަނީ މޫސުމީ ނުރައްކާތަކުން ނާޒުކު ގައުމުތަކުގެ މުސްތަގުބަލު ނެތެމުން ދާއިރު، މިއީ އެމެރިކާ ފަދަ ބޮޑެތި ގައުމުތަކުން އިސް ނަގައި، އެކަން ބަދަލުކުރުމަށް ނަމޫނާ ދައްކަންވީ ވަގުތު ކަމަށާއި، ދުނިޔޭގެ 70 އަށްވުރެ ގިނަ ގައުމުން ސީވީއެފް އާއިއެކު ކުރާ މަސައްކަތުގައި ބައިވެރިވެ، ޕެރިސް ކްލައިމެޓް އެއްބަސްވުން ތަންފީޒުކުރުމަށް ބާރުއެޅުމަށްވެސް ބަޔާނުގައި ގޮވާލާފައިވެއެވެ.

އަޅުގަނޑު، ރައީސް ޓްރަމްޕަށް ދައުވަތު އަރުވަން، އަޅުގަނޑުގެ އުފަން ގައުމު ރާއްޖެ ހިމެނޭ ގޮތަށް، އަޅުގަނޑުމެންނަށް ކުރިމަތިވެފައިވާ ބައެއް ގޮންޖެހުންތައް ގާތުން ބައްލަވައިލެއްވުމަށް،" ސީވީއެފް ގެ ބަޔާނުގައި ބުނެފައިވެއެވެ.

އެ ބަޔާނުގައި ބުނެފައިވަނީ މޫސުމީ ކާރިސާތަކާ ދެކޮޅަށް ކުރާ މަސައްކަތުގައި ހުރިހާ ގައުމުތަކެއް ގުޅިގެން އެއް އަމާޒަކަށް މަސައްކަތް ކުރަންޖެހޭ ކަމަށާއި އަދި ޕެރިސް އެއްބަސްވުމުގައި އެމެރިކާ އިން އަލުން ބައިވެރިވާނެ ކަމަށް ޔަގީން ކުރައްވާ ކަމަށެވެ.

ޕެރިސް ކްލައިމެޓް އެއްބަސްވުމަކީ ފްރާންސްގެ ވެރިރަށް ޕެރިސްގައި 2015 ވަނަ އަހަރު ގައުމުތަކުން އިގުރާރުވި ދުނިޔޭގެ ހޫނުމިން މަތިވުން ހުއްޓުވުމަށްޓަކައި ޖައްވަށް ވިހަ ގޭސްތައް ބޭރުކުރުން މަދުކުރުމަށްޓަކައި ވެފައިވާ އެއްބަސްވުމެކެވެ. ޓްރަމްޕްގެ ފުރަތަމަ ވެރިކަމުގެ ތެރޭގައިވެސް އެ އެއްބަސްވުމުން އެމެރިކާ ވަކިވި އެވެ. ނަމަވެސް، ރައީސް ޖޯ ބައިޑެންގެ ސަރުކާރުން ޓްރަމްޕްގެ އެ ނިންމެވުން ބާތިލުކޮށް، ޕެރިސް އެގްރީމެންޓުގައި އަލުން ބައިވެރިވީ 2021 ވަނަ އަހަރު އެވެ.