ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) ގެ ފުރިހަމަ މެންބަރުކަން ފަލަސްތީނަށް ލިބިއްޖެއެވެ.
ޑަބްލިއުއެޗްއޯގެ މެންބަރުކަން ފަލަސްތީނަށް ދިނީ އެޖަމިއްޔާ 77 ވަނަ އަހަރީ ޖަލްސާގައި އެ ޖަމިއްޔާގެ މެންބަރުކަން ދިނުމަށް 101 ގައުމުން ތާއީދުކޮށްގެންނެވެ. މިކަމާ ދެކޮޅަށް 5 ގައުމަކުން ވޯޓު ދީފައިވާއިރު ވަކިކޮޅަކަށް ވޯޓު ނުދީ 21 ގައުމަކުން ތިއްބެވެ.
އެ ނިންމުމާއި ގުޅިގެން އެ އެސެމްބްލީގައި ބައިވެރިވެވަޑައިގަންވަމުން ގެންދަވާ ރާއްޖޭގެ ހެލްތް މިނިސްޓަރ ޑރ. އަބްދުﷲ ހަލީލް ވިދާޅުވީ، މި ތާރީީހީ ނިނިންމުމާއެކު، އެހެން ގައުމުތަކަށް ލިބިގެންވާ ހުރިހާ ހައްގެއް ފަލަސްތީނަށް ވެސް ދުނިޔޭގެ ސިއްހަތު ޖަމްއިއްޔާގައި ލިބިގެންދާނެ ކަމަށެވެ. އޭގެތެރޭގައި ބަޖެޓް ލިބުމާއި ވޯޓުލުމުގެ ހައްގު ހިމެނެއެވެ.
"ފަލަސްތީނުގެ ރައްޔިތުންނަށް ލިބެންޖެހޭ ހައްގުތައް ކަށަވަރު ކުރުމަށް ރާއްޖޭގެ ރައީސުލްޖުމްހޫރިއްޔާ ޑރ. މުއިއްޒުގެ ފުރިހަމަ ލަފާފުޅާއެކު އިސްލާމީ ގައުމުތަކާއެކު ވާރލްޑް ހެލްތު އެސެމްބްލީގައި ރާއްޖޭން ވަނީ ވަރަށް ބޮޑަށް ވަކާލާތުކޮށްފައި،". ހަލީލް ވިދާޅުވިއެވެ.
މި ނިންމުމަށް މަރުހަބާ ކިޔާ ފޮރިން މިނިސްޓަރު މޫސާ ޒަމީރު ވިދާޅުވީ، މި ނިންމުމަކީ ވެސް ދުނިޔޭގެ ގައުމުތަކުން ފަލަސްތީނަށް ތާއީދުކުރާކަން އަންގައިދޭ ކަމެއް ކަމަށާއި މި ނިންމުމާ ގުޅިގެން ފަލަސްތީނަށް ޑަބްލިއުއެޗްއޯގެ މެންބަރު ގައުމެއްގެ ގޮތުގައި ބަޔާން ދިނުމާއި، ހުށަހެޅުންތަކާއި އިސްލާހުތައް ހުށަހެޅުމާއި ކޯ ސްޕޮންސަރ ކުރުމުގެ ހައްގު ލިބިގެންދާނެ ކަމަށެވެ.
އަދި ފަލަސްތީނަކީ މިނިވަން ދައުލަތެއްގެ ގޮތުގައި ކަނޑައަޅައި، 1967 ވަނަ އަހަރުގެ ކުރިން ބޯޑަރު އޮތްގޮތަށް އިރުމަތީ ގުދުސަކީ ފަލަސްތީނުގެ ވެރިރަށް ގޮތުގައި ކަނޑައެޅުމަށް އަދި ބައިނަލްއަގްވާމީ ޖަމިއްޔާތަކުގެ ފުރިހަމަ މެމްބަރުކަން ފަލަސްތީނަށް ހޯދުމަށް ދިވެހިރާއްޖެއިން އަބަދުވެސް ފުރިހަމައަށް ތާއީދު ކުރާ ކަމަށް ޒަމީރު ވިދާޅުވިއެވެ.
At the 77th World Health Assembly (#WHA77), the #Maldives co-sponsored and voted in favour of the resolution to align the participation of the State of #Palestine in the @WHO with its participation in the @UN.
This groundbreaking decision is yet another sign that a majority of… https://t.co/ChKOVny2OC
— Moosa Zameer (@MoosaZameer) June 2, 2024
މިނިސްޓަރުންގެ އިތުރުން ރައީސް ޑރ. މުހައްމަދު މުއިއްޒު ވިދާޅުވީ، ޑަބްލިއުއެޗްއޯގެ މެންބަރުކަން ފަލަސްތީނަށް ދޭން 101 ގައުމުން ވޯޓު ދިނުމަކީ، ފަލަސްތީނު ފުރިހަމަ މިނިވަން ދައުލަތެއްގެ ގޮތުގައި އޮތުމަށް ގައުމުތަކުގެ ތާއީދު އިތުރުވަމުންދާކަމުގެ ނިޝާނެއް ކަމަށެވެ.
އަދި ފަލަސްތީނަށް ލިބެންޖެހޭ ހައްގުތައް ކަށަވަރުކުރުމަށް އަދި ބައިނަލްއަގްވާމީ ޖަމިއްޔާތަކުގެ ފުރިހަމަ މެމްބަރުކަން ފަލަސްތީނަށް ހޯދުމަށް ދިވެހިރާއްޖެއިން އަބަދުވެސް ތާއީދު ކުރާނެ ކަމަށް އެމަނިކުފާނު ވެސް ވިދާޅުވިއެވެ.
ސްވިޓްޒަރލޭންޑުގެ ޖެނީވާގައި މިއަހަރު ކުރިއަށް ދިޔަ ޑަބްލިއުއެޗްއޯގެ އަަހަރީ ޖަލްސާގައި ރާއްޖޭގެ ފަރާތުން އެންމެ އިސްކޮށް ބައިވެރިވެވަޑައިގެންނެވީ ހެލްތު މިނިސްޓަރު ޑރ. އަބްދުﷲ ހަލީލް އެވެ.
