ސުކޫލު ތަކުގައި އަންހެން ކުދިންނާ ފިރިހެން ކުދިންނަށް ވަކި ކުލާސްތައް ހެދުމަށް އިމްލުވެރިންގެ ގުޅުމުން އެދެފި އެވެ.

ރާއްޖޭގެ ސްކޫލުތަކުގައި ދެ ޖިންސުގެ ދަރިވަރުން މ ައްސުނި ނުކޮށް، ކިޔަވައިދެވޭނެ ގޮތްތައް ހަމަޖައްސައިދޭން އިލްމުވެރިންގެ ގުޅުމުން އެޑިއުކޭޝަން މިނިސްޓަރު ޑރ. އިސްމާއީލް ޝަފީއު އަރިހުން އެދިއްޖެއެވެ.

އެކަން ބަޔާންކޮށް ސަލަފް ޖަމިއްޔާގެ ފަރާތުން އެޑިއުކޭޝަން މިނިސްޓަރ ޑރ އިސްމާއިލް ޝަފީއުއަށް ފޮނުވި ސިޓީގައި ވަނީ 2008 ވަނަ އަހަރާ ހަމައަށް ރާއްޖޭގެ ބޮޑެތި ސްކޫލްތަކުގައި އަންހެން އަދި ފިރިހެން ކުދިން ތިބީ ވީހާ ވެސް ބޮޑަކަށް ވަކިކުރެވިފައި ކަމަށާއި، ނަމަވެސް، ފުރަތަމަ އުފެދުނު އެމްޑީޕީ ސަރުކާރާއެކު ގެނެވުނު ބަދަލުތަކަކީ އިސްލާމީ އުޞޫލުތަކާއި ދިވެހީންގެ ސަޤާފަތާ ބީރަށްޓެރި، ސެކިއުލާ ފިކުރެއްގެ މައްޗަށް ބިނާވެފައިވާ ބަދަލުތަކެއް ކަމަށެވެ.

އެހެންކަމުން ދެ ޖިންސު މައްސުނި ކުރުމަކީ ދަރިވަރުންގެ އަޚްލާޤާއި ސުލޫކަށް އޭގެ ނޭދެވޭ އަސަރުކުރާ ކަމާ ށާއި، ހަވާޑް ޔުނިވާސިޓީއާއި ބީބީސީ ފަދަ ބައިނަލްއަޤުވާމީ މުއައްސަސާތަކުގެ ދިރާސާތަކުން އެކަން ހާމަވާކަމަށް އެ ސިޓީގައި ބަޔާންކޮށްފައިވާއިރު ދާދިފަހުން އައްޑޫ ހައި ސްކޫލުގައި ހިނގާދިޔަ ހާދިސާއަކީ 2 ޖިންސު މައްސުނިކޮށް ކިޔަވައިދިނުމުގެ ސަބަބުން ކުރިމަތިވާ އަޚްލާޤީ މައްސަލަތައް ކަމަށްވެސް ބަޔާންކޮށްފައި ވެއެވެ.

ސަލަފުގެ އެ ސިޓީގައި މައިގަނޑު ގޮތެއްގައި އެދިފައިވަނީ ސްކޫލްތަކުގެ މާޙައުލަކީ ދެ ޖިންސު މައްސުނި ނުވާނެ ފަދަ މާޙައުލަކަށް ހެދުމަށް ކަމާގުޅޭ އުޞޫލުތައް އިސްލާހުކޮށްދިނުމަށެވެ.