އިންތިހާބުތައް އެއްކުރަން އުޅެނީ ހަރަދުކުޑަކުރަން ނޫން ކަމަށާއި، އެބަދަލުގެންނަން އުޅެނީ ސަރުކާރުގެ ދައުރު ދަންމާލަން ކަމަށާއި އެކަމާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ދެކޮޅުކަމަށް އެމްޑީޕީގެ ވަގުތީ ޗެއާޕާސަން އަބްދުއް ގަފޫރު މޫސާ (ގަޕޯ) ވިދާޅުވެއްޖެއެވެ.

ރިޔާސީ އިންތިހާބާއި ރައްޔިޮތުންގެ މަޖިލީހުގެ އިންތިހާބު އެއްކޮށްލަން ގާނޫނު އަސާސީއަށް ބަދަލުގެންނަން ސަރުކާރުގެ ފަރާތުން ރައްޔިތުންގެ މަ ޖިލީހަށް ހުށަހަޅާފައިވާ ބިލުގެ ބަހުސް ވަގުތުގައި ވާހަކަދައްކަވަމުން ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަދި އެމްޑީޕީގެ ވަގިތީ ޗެއާޕާސަން އަބްދުލް ގަފޫރު މޫސާ ވިދާޅުވީ ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށް ބާއްވަން ގާނޫނު އަސާސީ ބަދަލުކުރަން ސަރުކާރުން އުޅެނީ ސަރުކާރުގެ ދައުރު ދަންމާލަން ކަމަށާއި، އެ ބަދަލަކީ ހަރަދުކުޑަކުރުމުގެ ގޮތުން ގެންނަންއުޅޭ ބަދަލެއް ނޫން ކަމަށެވެ.

2 އިންތިހާބު އެއްކޮށްލަން އެމްޑީޕީ ތާއީދު ނުކުރާނެކަން ހާމަކޮށް ގަފޫރު ވިދާޅުވީ އެކަން އެގޮތަށް ކުރާނަމަ ގައުމީ ޔުނިވާސިޓީ މެދުވެރިކޮށް ރަނގަޅު ދިރާސާއެއް ކުރަންޖެހޭ ކަމަށާއި، ހަރަދުބޮޑުވެގެން އެއްކޮށްލާ ނަމަ އެއްކޮށްލާނީ ރިޔާސީ އިންތިހާބާއި ލޯކަލް ކައުންސިލްތަކުގެ އިންތިހާބް ކަމަށާއި، އެގޮތުން ރިޔާސީ އިންތިހާބާއި ކައުންސިލް އިންތިހާބު އެއްކޮށްލައި، ދައުރުގެ މެދު ތެރެއިން މަޖިލިސް އިންތިހާބު ބާއްވަން ރަނގަޅު ކަމަށް ވެސް ގަޕޯ ވިދާޅުވި އެވެ.

އިތުރަށް ގަޕޯ ވިދާޅުވީ ސަރުކާރުން މަސައްކަތްކުރަނީ ވެ ރިކަމުގެ ދައުރު 10 އަހަރަށް ދަންމާލަން ކަމަށާއި، އެކަމަށް ބާރުދޭ ވާހަކަތަށް ސަރުކާރަށް ތާއިދުކުރާ ފަރާތްތަކުން ވަރަށް ބާރަށް މިހާރުވެސް ދައްކަމުންދާ ކަމަށެވެ. 

އަދި ގަފޫރު އިތުރަށް ވިދާޅުވީ ހަރަދު ކުޑަކުރުމުގެ ގޮތުން 2 އިންތިހާބް އެއްކޮލަށް އުޅޭ އިރު، ލޯކަލް ގަވަރުމަންޓް މިނިސްޓްރީ ދަށުން ހިންގަމުން އަންނަ ޕަބްލިކް ވޯކްސް އަށް މިއަދު ވެސް 500 މީހުން ވައްދަން އިއުލާނުކޮށްފައި އެބަ އޮތް ކަމަސާއި އެއީ އަހަރަކު 72 މިލިޔަން ރުފިޔާ ހަރަދުވާނެ ކަމެއް ކަމަށެވެ.

ސަރުކާރުން ހުށަހެޅި މި ބިލުގައި ބުނެފައިވަނީ ރައްޔިތުންގެ މަޖިލީހަށް މީހުން ހޮވުމަށާއި ރައީސުލްޖުމްހޫރިއްޔާ ހޮވުމަށް ބާއްވާ ރިޔާސީ އިންތިހާބު ބާއްވަން ވާނީ ދެ އިންތިހާބު އެކީގައި ކަމަށް ކަނޑައެޅުން ކަމަށާއި މިހާރު އޮތް ތައްޔިތުންގެ މަޖިޅިހުގެ ދައުރު ކުރުކޮށް ރައްޔިތުންގެ މަޖީލީހުގެ ދައުރު ފެށޭ ދުވަހަކީ ޑިސެމްބަރ 1 ކަމުގައި ކަނޑައެޅުމާއި އަދި ދެން ފެށޭ ރައްޔިތުންގެ މަޖިޅިހުގެ ދައުރު ފެށޭ ތާރީހަކީ 1 ޑިސެމްބަރ 2028 ކަމުގައި ކަނޑައެޅުމެވެ.