ސަރުކާރުން ކަންކަން ޢިއުލާންކުރަނީ، ކުއްލިއަކަށް އެއްވެސް ކަމެއް ނުބައްލަވައި ނޫން ކަމަށާއި، އޭގެ ބަދަލުގައި ކަންކަން ޢިއުލާން ކުރައްވަނީ، އެ ކަންކަން ރާވައި އެކަންކަން ކުރުމަށް މަޝްވަރާކުރުމަށް ފަހު، އެކަންކަން ކުރެވޭނެ ގޮތްތައް ކަނޑައަޅައިގެން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެ އެވެ.

ރައީސް މުޢިއްޒު މިހެން ވިދާޅުވީ، ހއ. އަތޮޅުގެ ރަށްތަކަށް އެމަނިކުފާނު މިއަދު ފެއްޓެވި ދަތުރުފުޅުގައި މުރައިދޫ ރައްޔިތުންނާ ބައްދަލު ކުރެއްވުމަށް އެރަށު ސުކޫލުގައި ބޭއްވެވި ޖަލްސާގައި ވާހަކަފުޅު ދައްކަވަމުންނެވެ. މި ބައްދަލުވުމުގައި ރައީސް ވިދާޅުވީ ސަރުކާރުން ކުރާނެ ކަންކަން ތަރުތީބު ކުރެވިގެން ދާނެ ގޮތް އަބަދުވެސް ހާމަކުރައްވަމުންގެންދަވާ ކަމަށެވެ.

އަޅުގަނޑު އަބަދުވެސް މަސައްކަތް ކުރާ ގޮތަކީ ރައްޔިތުންގެ ގާތުން ކަންކަން އޮޅުން ފިލުވައިގެން، އެންމެ އިސްކަން ދޭން ޖެހޭ ކަންކަމަށް އިސްކަންދީގެން، ރައްޔިތުންނަށް އެ ދަތިވާކަން ކަމަށް ޙައްލުތައް ގެނެސްދިނުމަށް“ ރައީސް މުޢިއްޒު ވިދާޅުވި އެވެ.

މުރައިދޫގެ ތަރައްޤީއަށް ރާއްވަވާފައިވާ ކަންކަމުގެ ތެރޭގައި ބަނދަރުގެ މަޝްރޫޢު، މަގު ހެދުން، ޞިއްޙީ ޚިދުމަތް ފުޅާކުރުން އަދި ސްކޫލަށް ބޭނުންވާ ވަސީލަތްތައް ހޯދައިދިނުން ހިމެނޭ ކަމަށް ރައީސް ވިދާޅުވި އެވެ. އަދި މި ހުރިހާ ކަމެއްވެސް ތަރުތީބުން ކުރިއަށް ގެންދަވާނެ ކަމަށް އެމަނިކުފާނު ވަޢުދުވެވަޑައިގަތެވެ.

މި ދަތުރުފުޅުގައި ރައީސް މުޢިއްޒު ވަނީ މުރައިދޫގައި އަލަށް އިމާރާތްކުރެވޭ ފުލުހުންގެ މަރުކަޒާއި އައު ކައުންސިލް އިދާރާގެ ބިންގާ އަޅުއްވައި ދެއްވާފަ އެވެ. އަދި ބޭންކް އޮފް މޯލްޑިވްސްއިން މުރައިދޫގައި އޭޓީއެމް ބެހެއްޓުމުގެ މަސައްކަތް ރަސްމީކޮށް ރަށު ކައުންސިލާ ހަވާލުކުރައްވާފައިވެ އެވެ.