މިނިވަން
އިންތިހާބު ގިނަވި ވަރަކަށް ރަ
އްޔިތުންނަށްވާ ފައިދާ ބޮޑުވޭ، ތަރައްގީ އަވަސްވާ އެންމެ ބޮޑު ސަބަބަކީވެސް އިންތިހާބު ގިނަވުން
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮޅުމަށް ސަރުކާރުން ރައްޔިތުންގެ މަޖިލީހަށް ވަނީ ބިލެއް ހުށަހަޅާފައެވެ.
ބިލުގެ މަގްސަދެއް ކަމަށް މިވަނީ އިންތިހާބަށް ކުރަން ޖެހޭ ޙަރަދު ބޮޑުވީމަ ޙ
ަރަދު ކުޑަކުރުމެވެ. ސަރުކާރުގެ މި ހުށަހެޅުމާއެކު މި މައުލޫގެ ބަހުސް މިވަނީ ފެށިފައެވެ. އާންމު ހުރިހާ ރައްޔިތުންގެ މަސްލަހަތާވެސް ގުޅިފައިވާ ކަމަކަށްވާތީ މި މައުލޫގައި ގިނަ ބަޔަކު ދަނީ އެކި މަންސަ ތަކުގައި ހިޔާލު ފާޅުކުރަމުންނެވެ.
ގައުމެއްގެ ހައިސިއްޔަތުން ރައްޔިތުންނާ ގުޅުންހުރި ކަންކަމުގައި ނިންމާ ނިންމުން ވާންވާނީ އިހުނަށްވުރެ ބޮޑު ފައިދާއެއް ގައުމަށާއި ރައްޔިތުންނަށްވާނެ ނިންމުމަކަށެވެ.
ތެދެކެވެ، ރައްޔިތުންގެ މަޖިލީހުގެ އިންތިހާބަކީ ރިޔާސީ އިންތިހާބަށްވުރެ ބޮޑު ޙަރަދު ހިނގާ އިންތިހާބެކެވެ. ނަމަވެސް ރިޔާސީ އިންތިހާބާ ކުރިމަތިވެގެން އަންނައިރު ސަރުކާރުން ރައްޔިތުންނަށް ކޮށްނުދެވި ހުންނަ ކަންކަން ކޮސްދޭން އަވަސްވެގަންނަ ފަދައިން ރައްޔިތުންގެ މަޖިލިސް އިންތިހާބު ބޯމަތިވުމުންވެސް ހަމަ އެގޮތަށް ސަރުކާރުން ރައްތްޔިތުންނަށް ނުކޮށްދެވި ހުންނަ އެތައް ކަމެއް ކޮށްދިނުމަށް އަވަސްވެ ގަނެއެވެ.
ރައްޔިތުންގެ މަޖިލީހުގެ މެޖޯރިޓީ ހޯދުމަށްޓަކައި ވޯޓުލާންތިބި މީހުން ހިތްހަމަ ޖައްސަން ރަށްރަށުގައި ހުއްޓިފައި ހުންނަ މަޝްރޫއުތަކާއި އަލަށް އެރަށްރަށަށް ބޭނުންވާ މަޝްރޫއުތައް ފަށައެވެ. އެކަމުގެ ސަބަބުން ރައްޔިތުންނަށް ހަމަ ގައިމުވެސް އެވަނީ ނުހަނު ބޮޑު ފައިދާ އެކެވ. ނަމަވެސް ރައްޔިތުންގެ މަޖިލިސް އިންތިހާބާއި ރިޔާރީ އިންތިހާބު އެއްވުމުން ރައްޔިތުންނަށް ލިބޭ މިދެންނެވި ކަންކަން ހުއްޓުމަކަށް އަންނާނެ އެވެ. ސަރުކާރަށް ރައްޔިތުންގެ ތާއިދު މުހިންމު ވާނީ ހަމައެކަނި ރިޔާސީ އިންތިހާބު ކައިރިވުމުންނެވެ.
ސުވާލަކީ ރައްޔިތުންގެ މަޖިލީހުގެ އިންތިހާބު ވަކިން ބާއްވަން ހިނގާ ހަރަދު ކުޑަވުމުން އެކަމުގެ ފައިދާ ރައްޔިތުންނަށް ސީދާ ގޮތުންވިޔަސް ނުސީދާ ގޮތުންވިޔަސް ކުރާނެ ތޯއެވެ. މިސުވާލުގެ ޖަވާބުގައި ބުނެވޭނީ ރާއްޖޭގައި މިހާތަނަށް ކަންކަން ހިނގަމުން އައިސްފައިވާގޮތަށް ބަލާއިރު އެކަމުގެ ފައިދާ ރައްޔިތުންނަށް ނުކުރާނެ ކަމަށެވެ. އޭގެ ބަދަލުގައި ސަރުކާރަށް އެލިބެނީ ހަނީމޫން ވަގުތުކޮޅެއްފަދަ ވަގުތުކޮޅެކެވެ. ރައްޔިތުންނާ ހަމައަށް ދާއްޖެހޭ ކަމެއް ނެތީމާ އެރައްޔިތުންގެ މަތިން ހަނދާން ނައްތާލާނެ ކަން މާޒީން އޮތީ ފެންނާށެވެ.
އިންތިހާބެއް ނެތްނަމަ ކަޑައެއްވެސް ޖަހައިދޭ ތަނެއް ފެނިގެން ނުދާ މާޒީ އަލުން އިއާދަކުރަން ރައްޔިތުން ބޭނުންވާނެ ބާއެވެ.
ރައްޔިތުންގެ މަޖިލީހުގެ އިންތިހާބު ބޯމަތިވުމުން އެއިރެއްގައި އޮންނަ ސަރުކާރުން ރައްޔިތުންގެ އިހްސާސްތައް އަޑު އަހައި އިޖާބަދޭ މިންވަރު އެތައް ތަނަކުން ބޮޑުވެގެންދެއެވެ. ސަރުކާރަށް އެރަށުގެ، އެ ދާއިރާގެ މަޖިލިސް ގޮނޑި މުހިއްމުވާތީ ރައްޔިތުންގެ ތާއިދު ސަރުކާރަށް ވަރަށްބޮޑަށް ބޭނުންވެއެވެ. އެހެންކަމުން ރައްޔިތުންގެ ތަކުލީފް ތަކަށް ލުއި ހޯދައިދީގެންނޫނީ ރައްޔިތުންގެ ތާއިދު ސަރުކާރަށް ހޯދޭކަށް ނުމެ އޮވޭމެއެވެ.
ތަންކޮޅެއް ކުރީގެ މާޒީއަށް ޖެހިލާއިރުވެސް ފެންނަންއޮތީ ހަމަ އެ ހަގީގަތެވެ. ރިޔާސީ އިންތިހާބަށް ޖަހާ ކަޑަ އެއައަށްފަހު އަންނަ ރައްޔިތުންގެ މަޖިލިސް އިންތިހާބު ކައިރިވުމުން އައުކުރެއެވެ. ނޫންނަމަ އެއާގުޅޭ އަމަލީ ކޮންމެވެސް މަސައްކަތެއް ފަށައިގަނެއެވެ. އަދި އެނޫންވެސް ރަށްރަށުގައި އިދާރީގޮތުންވިޔަސް ކުރަންހުންނަ މުހިންމު ބައެއް ކަންކަން ވާތަން ފެނެއެވެ.
ސުކޫލަށް ކުޅިވަރު ސާމާނު ނަމަވެސް ނުވަތަ ކުލާސް ރޫމުގައި ފަންކާ ހަރުކުރުންވިޔަސް ނުވަތަ ޓީޗަރަކު ނެތިގެން ކިޔަވާނުދެވި އޮންނަ މާއްދާ ކިޔަވައިދޭނެ ވަގުތީ ޓީޗަރެއް ނަމަވެސް ސަރުކާރުން ހަމަޖައްސައިދޭން އަވަސްވެގަންނަ ހިސާބަކީ ރައްޔިތު މީހާގެ އަތްމައްޗަށް ވޯޓް ކަރުދާކޮޅެއް އަރަން ކައިރިވާ ހިސާބެވެ. އެހެންކަމުން އެ ކަރުދާސްކޮލަކީ އާދައިގެ ކަރުދާސާކޮޅެއް ނޫންކަން ސަރުކާރަށާއި ރައްޔިތުންނަށްވެސް އޮންނަނީ އިނގިފައެއެވެ.
އެހެންކަމުން އެ ކަރުދާކޮޅާ ގުޅުވައި ސަރުކާރަށް ޑިމާންޑްތައްވެސް ރައްޔިތުން ކުރިމަތިކުރުވައެއެވެ. އަދި އެ ޑިމާންޑްތައް ފުއްދައިދޭންވެސް ސަރުކާރަށް މަޖުބޫރުވަނީ އެ އިންތިހާބު ގައި ގޮތް ކަނޑައަޅާން ތިބެނީ ރައްޔިތުން ކަމަށްވާތީއެވެ.
ދެންނެވި ސަބަބަށްޓަކައި އިންތިހާބުގެ ވޯޓު ކަރުސާކޮޅު ރައްޔިތު މީހާގެ އަތައް އެރުމުގެ ކުރިން އެ ރައްޔިތުމީހާ ހިތްހަމަ ޖައްސައިދޭން އޮންނަނީ މަޖުބޫރުވެފައެވެ. މި ސަބަބުކަށްޓަކައި، އިންތިހާބް ގިނަވުމަކީ ރައްޔިތުންނަށް ނުހަނު ފައިދާ ބޮޑު ކަމަކަށް ވެފައިވާއިރު ތަރައްގީ އަވަސްވާ އެންމެބޮޑު އެއް ސަބަބަކީވެސް އިތިހާބު ގިނަވުމެވެ.
